1. LILITH [Mod] (Off)
[ 29 Sep 2013, 22:48 ]
გერმანიის ქალაქები ბევრ საიდუმლოს გაგიმხელთ. ეს ქვეყანა მინიატურულ სურათს მოგაგონებთ, რომელიც სავსეა დიდი ქალაქების საუცხოო ხიბლით, პატარა ქალაქების მყუდროებით, მდიდარი კულტურითა და ხელოვნებით, საუცხოო ტაძრებით, გოტიკური ეკლესიებით და რა თქმა უნდა, უნიკალური ღვინითა და ლუდით.

ტერიტორიულად გერმანია საზღვარს ცხრა ქვეყანასთან იყოფს, აღსანიშნავია, რომ ევროპაში ამ მაჩვენებლით ის ერთადერთია. გერმანიის ტერიტორია დაყოფილია 15 რაიონად (bundeslander).


ისტორია

გერმანიის ისტორიაში ბევრს წაიკითხავთ დაპყრობისა და ოკუპაციის შესახებ. მდინარეებმა დუნაიმ და რეინმა გერმანული ტომები კათოლიკებისგან ჩვენი წელთაღრიცხვის პირველ ასწლეულში გაყო. თუმცა 500 წლის შემდეგ, ქრისტიანობა ამ მიწაზეც გავრცელდა. საფრანგეთის მეფემ კარლ დიდმა, რომელმაც საქსონიელებსა და ბავარიელებზე გაიმარჯვა, მეცხრე ასწლეულის დასაწყისში პირველი რეიხი (პირველი იმპერია) დააარსა. უფრო მოგვიანებით, იტალიურ სამეფოებთან ურთიერთობამ რომის იმპერიის შემადგენლობაში შესვლა განაპირობა. 1517 წელს რეფორმაციულ მოძრაობას სათავეში მარტინ ლუთერი ჩაუდგა. შედეგად, დაძაბული ურთიერთობები პროტესტანტებსა და კათოლიკებს შორის, ცამეტწლიანი ომის მიზეზი გახდა, რომელიც მხოლოდ 1648 წელს დასრულდა. გერმანია ადგილობრივი პრინცების ძლიერმა მმართველობამ შეინარჩუნა იქამდე, ვიდრე პრუსიელების მთავრობა არ გაძლიერდა და 1871 წელს გერმანიის იმპერია (მეორე რაიხი) არ ჩამოყალიბდა. იმ დროს კანცლერი ცნობილი ოტო ფონ ბისმარკი იყო, ხოლო პირველი კაიზერი ვილჰელმ I. მხოლოდ კიდევ ორი კაიზერის მმართველობის დასრულების შემდეგ, მონარქია დასრულდა. ვილჰელმ II-მ საკუთარ გვირგვინზე უარი პირველი მსოფლიო ომის ბოლოს თქვა.

ბერლინი

ბერლინი გერმანიის და ზოგადად, მსოფლიოს ერთ-ერთი ყველაზე უჩვეულო ქალაქია. სტრატეგიული მნიშვნელობის გამო, მდინარე შპრეეზე მისი დაარსების დღიდან (მე13 საუკუნე), ბერლინი არასოდეს იქცევდა ისეთ ყურადღებას, როგორსაც ის უკანასკნელი 100 წლის განმავლობაში იქცევს. ბერლინი გერმანიის გულია, მისი ბრწყინვალება ნათლად შეიგრძნობა მსხვილ დაწესებულებებში, უჩვეულო მუზეუმებსა და თეატრებში, მდიდრულ რესტორნებში, ხმაურიან ღამის კლუბებში და ა.შ. ბერლინი საუცხოო ქალაქია სასეირნოდ.


ფრანქფურტი

ეს ქალაქი ტურისტების უმრავლესობაში ბანკებისა და მსხვილი ფირმების სუპერთანამედროვე ცათამბჯენებთან ასოცირდება. ეს გასაგებიცაა, რადგან ფრანქფურტი გერმანიის ნამდვილი ეკონომიკური და ფინანსური ცენტრია. სწორედ იქ მდებარეობს ოთხას ოცზე მეტი გერმანული და საერთაშორისო საკრედიტო-საფინანსო კომპანია და ბანკი. ყოველწლიურად ქალაქში ოცდათოთხმეტზე მეტი გამოფენა და ბაზრობა იმართება, რისთვისაც ფრანქფურტში 1,3 მილიონზე მეტი დამთვალიერებელი ჩადის. ოცდათოთხმეტი გამოფენიდან თხუთმეტი თავის სფეროში, მსოფლიოში ყველაზე მსხვილი გამოფენაა. ყოველწლიურად ქალაქში 55.000-ზე მეტი კონგრესი, სემინარი, კონფერენცია და ა.შ. იმართება.


მიუნხენი

ეს ლუდისა და ბაროკოს დედაქალაქია. მისი იერსახე განსხვავებულია. მიუნხენი ეს არის მეგაპოლისი და "დიდი სოფელი", სადაც თქვენ შეიძლება ქუჩაში მოგესალმონ. ის ყველა ევროპული სტილის არქიტექტურის მუზეუმია, ზოგადად კი, ის ასოცირდება მსოფლიოში ცნობილ ლუდთან, შემწვარ ძეხვთან და ყველაზე დიდ დღესასწაულთან მსოფლიოში, რომელსაც ოქტობერფესტი ჰქვია. მიუნხენი-ეს არის საუცხოო ბუტიკები და ბევრი ცნობილი ევროპელის და რა თქმა უნდა, გერმანელის თავშეყრის ადგილი. ის გერმანიის სამრეწველო დედაქალაქია. გარდა ამისა, ის კინემატოგრაფიის ქალაქია და მსოფლიო ფერწერის საგანძურსაც წარმოადგენს.


ვეიმარი

ეს პატარა გერმანული ქალაქი ადგილობრივებისთვის ერთგვარი, კულტურული მემკვიდრეობაა. ვეიმარში ცხოვრობდნენ ისეთი ინტელექტუალური გიგანტები, როგორიცაა: ბახი, შილერი, ლისტი, ნიცშე, გოეთე და სხვები. თანამედროვე არქიტექტურის ქვაკუთხედად არის ქცეული ვალტერ გროპიუსის მიერ დაარსებული ბაუხაუსის სკოლა. თავისი ისტორიული მნიშვნელობის წყალობით, ვეიმარმა საკმაოდ დიდი დაფინანსება მიიღო შენობების რეკონსტრუქციისათვის და 1999 წელს ევროპის კულტურული დედაქალაქის სტატუსი მიენიჭა.

რეინის ველი

რეინის ყველაზე საუცხოო ველი მაინცსა და კობლენცს შორის მდებარეობს. იქ საუცხოო ლანდშაფტია. ამ ტერიტორიაზე თქვენს ყურადღებას მიიქცევს ვენახები, ბევრი ციხე-სიმაგრე და პატარა სოფლები, რომლებიც ღვინის წარმოებას ეწევიან. წელიწადში ერთხელ, ყველა სოფელს ღვინის თავისი დღესასწაული აქვს. ყველაზე ცნობილ ღონისძიებას კი "რეინი ცეცხლში" წარმოადგენს, როდესაც ირგვლივ ყველაფერი ფეიერვერკებითა და საუცხოო სპეცეფექტებით ირთვება.


ლუბეკი

შუასაუკუნეების საუცხოო ქალაქია, რისი წყალობითაც ის იუნესკოს მსოფლიო მემკვიდრეობათა ჩამონათვალში მოხვდა.

ალტშტატი (ძველი ქალაქი) მეორე მსოფლიო ომის დროს უმოწყალოდ იბომბებოდა. თუმცა შემდეგ მისი სრული რეკონსტრუქცია განხორციელდა და ახლა ის ისევ უჩვეულო ქალაქს წარმოადგენს.





კიოლნი

კიოლნი ყველაზე ძველი ქალაქია გერმანიაში. მისი სიმბოლოა ქალაქის ცენტრში აღმართული გოტიკური ეკლესია დათივის კოშკებით. ამ ეკლესიაში ბევრი შეუფასებელი ძვირფასეულობაა დაცული. ტაძარი, რომლის მშენებლობაც 750 წლის წინ დაიწყო, 1998 წელს იუნესკოს მსოფლიო მემკვიდრეობის სიაში შევიდა. ასევე არანაკლებ მნიშვნელოვანი ღირშესანიშნაობაა 12 ეკლესიისგან შემდგარი ანსამბლი, რომელიც შუასაუკუნეების ერთ-ერთი საუცხოო სიმბოლოა. ქალაქში ყოველთვის დიდი მხიარულებაა, ამიტომაც ის ტურისტებს წელიწადის ყველა დროს იზიდავს.

დრეზდენი

ის საქსონიის ფედერალური მიწის დედაქალაქია და გერმანიის უმნიშვნელოვანეს ინდუსტრიულ ცენტრს წარმოადგენს. სწორედ დრეზდენში გამოიგონეს თავის დროზე ევროპული ფაიფური. აქედან იღებს სათავეს ევროპული გიმნაზიის სისტემაც. გარდა ამისა, დრეზდენი ეს არის ფართო ელბა, რომელზეც საღამოობით საოცრად სასიამოვნოა ძველი გემით გასეირნება. ამ ქალაქში თქვენს განსაკუთრებულ ყურადღებას მიიქცევს ადგილობრივი სამზარეულო, მსუბუქი ღვინო და უჩვეულო ადგილობრივი დიალექტი.


ლეიპციგი

ეს ქალაქი XI საუკუნეში დაარსდა. ნახევარი საუკუნის შემდეგ, მას იმპერიული ბაზრობის ქალაქის" სტატუსი მიენიჭა, რითიც საფუძველი დაედო გამოფენებისა და ბაზრობების გამართვის რვასაუკუნოვანზე დიდ ტრადიციას. ახლანდელი ლეიპციგი ამაყობს საკუთარი საქმიანი წარსულით, თუმცა არ ივიწყებს საქმიან აწმყოსაც. ფრანქფურტის შემდეგ, ის გერმანიის მეორე "საბანკო" დედაქალაქია. ამ ქალაქში ყოველწლიურად 25 საერთაშორისო გამოფენა იმართება.





მაღაზიები

გერმანიაში მაღაზიები ერთგვარ ნაციონალურ თავისებურებას წარმოადგენს. ქვეყნის სამხრეთ ნაწილში სუვენირების სახით იყიდება Hummel-ის სტატუები, თერმომეტრები, მუქი სათვალეები, ხის ნაკეთობანი, ტყავის ნივთები, კამერები (და სხვა ოპტიკური მოწყობილობები, მაგალითად, ბინოკლი), ანტიკვარი, უნიკალური სათამაშოები და თოჯინები, ღვინო, ყველი, მინის ჭურჭელი და ა.შ. კლასიკური, შეკვეთით შეკერილი ტრადიციული სამოსი საუკეთესო ინვესტიციაა, როგორც მამაკაცის, ისე ქალბატონისათვის, რადგან ხარისხიანია და თანაც მოდიდან არასოდეს გადის.

დასავლეთ გერმანიაში შესაძლებელია ხის ნაკეთობების, ფაიფურის, საბჭოთა არმიის შესახებ დაწერილი სტატიების, თიხის ჭურჭლისა და ხელნაკეთი ნივთების შეძენა. ტურინგენის ტყის რაიონი ცნობილია თავისი მინით. კერძოდ, ქალაქს Lauscha იცნობენ, როგორც სადღესასწაულო მორთულობის მწარმოებელს. თუ ბავარიაში ზაფხულში ჩახვალთ, აუცილებლად ეწვიეთ ქალაქ Wasserburg-ს, სადაც კარგი სუვენირების შეძენას შეძლებთ.


ტრანსპორტი

გერმანიაში ტრანსპორტი უნიკალური მოვლენაა, უამრავი საცობის წარმოქმნის მიუხედავად, პუნქტუალობა მოძრაობის აუცილებელ წესებში შედის. მაგალითად, ჰამბურგში (გერმანიაში სიდიდით მეორე ქალაქი) თქვენ შეგიძლიათ წუთებში გათვალოთ მგზავრობა ქალაქის ერთი ბოლოდან მეორეში.




დღესასწაულები

ჯაზის ფესტივალი ბერლინში (ნოემბერი) ყველაზე პოპულარული ღონისძიებაა, რომელსაც სულმოუთქმელად ელოდებიან. ძალიან საინტერესოა მოსავლის ფესტივალი Rhineland-ში, რომელსაც თან ფეერვერკებიც ახლავს. ასევე საკმაოდ პოპულარულია Oktoberfest, რომელიც მიუნხენის სიახლოვეს ყოველწლიურად იმართება. იმ შემთხვევაში, თუ ამ ღონისძიებაზე მოხვდებით, თქვენ აღმოაჩენთ, რომ ფეხბურთის გულშემატკივრებს შორის იმყოფებით.

ბალნეოლოგიური კურორტები

ბადენ-ბადენი, ვისბადენი, ბადენვეილერი, ახენი, ვილდბადი, ბად-ვალდზე, ტაბარცი, ბად-ნაუგეიმი, ბად-ხომბურგი, ბად-კრეიცნახი, ბად-ელსტერი, ბად-ბრამბახი, ობერსტდორფი, ობერშტაუფენი, ობერვიზენტალი, ფრიდრიხროდი.

დრო თბილისთან მიმართებაში

-2 საათი



საბაჟო კონტროლი

ქვეყანაში იკრძალება ნარკოტიკების, იარაღის, ფსიქოტროპული მეტიკამენტების, საწამლავის შეტანა

ვალუტა

ევრო. ნაციონალური და უცხოური ვალუტის შეტანა ან ქვეყნიდან გატანა არ იზღუდება. იმ შემთხვევაში, თუ ფულს სასტუმროში, აეროპორტში ან სადგურზე დაახურდავებთ, თქვენგან პროცენტს აიღებენ.

ძირითადი ღირშესანიშნაობები

ბერლინი-პრუსიის კულტურული საგანძურის სახელმწიფო მუზეუმი; გამოყენებითი ხელოვნების მუზეუმი; მუსიკალური ინსტრუმენტების მუზეუმი; პერგამონის მუზეუმი; ბოდეს მუზეუმი; შარლოტენბურგის სასახლე, რომლის ტერიტორიაზეც ანტიკური და ეგვიპტური მუზეუმი მდებარეობს; გერმანული ფოლკლორის მუზეუმი; ბრანდერბურგის ჭიშკარი (1788-1791); არსენალის შენობა (1695-1706); წმინდა ხედვიგის ტაძარი (1747-1773); წმინდა ნიკოლოზის ტაძარი (XIV ს.); რაიხსტაგის შენობა (1884-1894); 67-მეტრიანი გამარჯვების კოლონა (1873); მსოფლიოში უდიდესი ტირგარტენის ზოოპარკი; ბერლინის სატელევიზიო ანძა (365 მ.); ბოტანიკური ბაღი; ბავარიის ნაციონალური მუზეუმი; ნიმფენბურგის სასახლე; გერმანიის თეატრალური მუზეუმი; კიოლნი-კიოლნის ტაძარი (1248-1880, 157მ.); სანქტ-მორის-იმ-კოპიტალი (1049); სანქტ-გერეონის ტაძარი (II ს.); სანქტ-კლიბერტის ტაძარი (XIII ს.); მართლმადიდებლური ეკლესია (XIX ს.); აღმოსავლეთ აზიის ხელოვნების მუზეუმი; შტუტგარდი-ავტომობილების მუზეუმი; ზოოპარკი, ბოტანიკური ბაღი; ჰამბურგი-საზღვაო პორტი; პოტსდამი-სან-სუსის სასახლე; ფრანქფურტი-არქიტექტურული ნეოგოტიკური კომპლექსი რემერი; თანამედროვე ხელოვნების მუზეუმი; დიუსელდორფი-რაინტრუმის კოშკი; ბენრატის სასახლე; ჰამბურგი-"წითელი შუქურების" რაიონი რეპერბანი (ან სანქტ-პაული), სადაც 18 წლამდე შესვლა აკრძალულია.


ბრანდენბურგის ჭიშკარი



[Pasuxi][Cit]|