ალ პაჩინო | Qartuli Forumi

1. LILITH [Mod] (Off)
[ 29 Sep 2013, 22:38 ]
ერთ-ერთი ფილმის გადასაღებ მოედანზე ალ პაჩინოს ეშმაკი შეარქვეს, ცუდი ხასიათის გამო კი არა, ნიჭიერი თამაშისთვის, რომელიც მნახველს მისტიკურ შიშს ჰგვრიდა.

ბავშვობაში პატარა ალფრედოს "სანის" – ანუ შვილიკოს - ეძახდნენ. ბიჭს 7 წლამდე ბებიის ან ბაბუის გარეშე გარეთ ცხვირს არ აყოფინებდნენ. სკოლაში შურით სავსე თანაკლასელებს ტეხასის უზარმაზარი ფერმის ლამაზი ისტორიებით უმასპინძლდებოდა – იქ ათი ძაღლი და საკუთარი ცხენი ჰყავდა. სინამდვილეში, თუკი სადმე უნახავს ცხენი, მხოლოდ ნიუ-იორკის ზოოპარკში, რომლის მახლობლად მისი უღიმღამო ბავშვობა ნაღვლიანად და უფერულად მიედინებოდა.

* * *
1940 წლის 25 აპრილს ვარსკვლავისთვის არცთუ შესაფერ ადგილას – ჰარლემში - დაიბადა. როცა ვაჟიშვილს 2 წელიც არ შესრულებია, ბუღალტერი სალვატორე პაჩინო ფრონტზე გაიწვიეს (მეორე მსოფლიო ომი), საღ-სალამათი დაბრუნდა, მაგრამ ოჯახი თვალწინ ენგრეოდა. სახლში ტრადიციული იტალიური სკანდალის გარეშე დღე არ გადიოდა. ძალიან მალე სენიორი და სენიორა პაჩინოები გაიყარნენ.

“თოლია”: მარტოდარჩენილი (თუ, რა თქმა უნდა, ვაჟიშვილსა და სამ ქალიშვილს არ ჩავთვლით) როზა პაჩინო მშობლების სახლში გადავიდა.

ღარიბული და მოწყენილი ცხოვრება ჰქონდათ. ერთადერთი სიხარული კვირას, დედასთან ერთად კინოთეატრში ლაშქრობა იყო. მერე კი მთელი უგრძესი კვირის მანძილზე ბიჭი იმით ერთობოდა, რომ ბებოს წინაშე ნანახი ფილმის სცენებს თამაშობდა.

არდადეგებზე დეიდებთან უშვებდნენ, სადაც კიდევ უფრო მოსაწყენი და უსიხარულო დღეები ელოდა. ორივე შინაბერა იყო და სრულიად ყრუ. ,,რადგან ურთიერთობა აუცილებელი იყო, - ამბობდა მსახიობი, - დასახმარებლად გამოსახვის ყველანარიი საშუალების პოვნა ხდებოდა საჭირო. სამსახიობო ოსტატობის უკეთესი სკოლის წარმოდგენა ძნელია!”

ალფრედო საშინლად სწავლობდა, საშინლად სწყინდებოდა გაკვეთილებზე, სამაგიეროდ, შესვენებაზე მთელი კლასი მას უსმენდა – საუკეთესო მოამბე იყო. ბიჭი სასკოლო წარმოდგენებზეც ბრწყინავდა. ორიანების მიუხედავად, შორსმჭვრეტელმა მასწავლებლებმა ”უფროს ასაკში წარმატების ყველაზე სავარაუდო პრეტენდენტის” ტიტულით აღჭურვეს. მალე სონიმ დატოვა სასწავლო დაწესებულების კედლები. თაღლითების იტალიურ ბანდას არ შეერთებია, რისაც დედას ყველაზე მეტად ეშინოდა.

ალ პაჩინო – მეტსახელად ’’ეშმაკი’’

უბრალოდ თავის მე-14 დაბადების დღეზე პირველად მოხვდა თეატრში (ჩეხოვის “თოლიას” თამაშობდნენ). შეძრა თეატრმა – მაშინვე განისაზღვრა მომავალი პროფესიის არჩევანიც. მათემატიკა და ბიოლოგია სრულიად უსარგებლო საგნებად ეჩვენებოდა. ჩეხოვი კი დღემდე მის ფავორიტად რჩება, შვილსაც იტალიელისთვის ეგზოტიკური სახელი - ანტონი დაარქვა.

17 წლის ასაკში ალფრედო სახლიდან წავიდა და სურდა, კარიერისთვის მიეხედა. მოზარდის გადაწყვეტილებამ გრანდიოზული სკანდალი გამოიწვია და დედას გულთან პრობლემები შეექმნა. პაჩინო დღემდე იდანაშაულებს თავს მის ნაადრევ გარდაცვალებაში. მაშინ განცდებისგან კინაღამ ფსიქიატრიულ საავადმყოფოში მოხვდა.

ალ პაჩინო – მეტსახელად ’’ეშმაკი’’ყველა საქმე კარგია!
როგორც გაირკვა, მისის პაჩინო ტყუილად არ ნერვიულობდა. მომდევნო 10 წლის მანილზე მის უძღებ შვილს ძლივს გაჰქონდა თავი და ბოლოს ცუდ კომპანიაშიც მოხვდა. 1960 წელს ალფრედო იარაღის უკანონო ტარებისთვის დაიჭირეს. 50-დოლარიანი ჯარიმით გადარჩა, თუმცა, ეს ასტრონომიული თანხა იყო მისთვის.

საუზმეზე და სადილებზე ფული რომ არ დაეხარჯა, დღის 4 საათამდე ძილს აიძულებდა თავს და მერე პირდაპირ თეატრში მიდიოდა. ავტობუსის ფულს, როგორც წესი, სესხულობდა. დაქირავებული ოთახებიდან ხშირად აძევებდნენ გადაუხდელობის გამო. მაშინ თეატრში ათევდა ღამეს. დღის რეპეტიციებს არ ესწრებოდა:

ან რად უნდოდა რეპეტიცია დარაჯს, დამლაგებეს ან ბილეთის გამსაღებელს – სწორედ ამ პროფესიებს ეუფლებოდა ახალგაზრდა ალ პაჩინო. და ყველა ადგილიდან სამარცხვინოდ აგდებდნენ. ერთ თეატრში მუსიკით მოჯადოებული გამუდმებით სხვის ადგილზე სვამდა მაყურებელს. მეორეში ბილეთის შემოწმება ავიწყდებოდა, რადგან სარკის კედელზე საკუთარი გამოსახულებით ტკბებოდა.

ასეთ პირობებში კიდევ ახერხებდა სწავლას. თან სადღაც კი არა, ნიუ-იორკის სახელგანთქმულ სამსახიობო სტუდიაში, თავად ლი სტრასბერგთან, “ამერიკელ სტანისლავსკის” რომ უწოდებდნენ.

სცენაზე პირველი გამოჩენისას ალ პაჩინოს კრიტიკოსები უბრძოლველად დანებდნენ. როლში ისე შედიოდა, რომ გასაგები გახდა: ახალი ვარსკვლავი ამოვიდა. ასეთი სრული “განფენა” უსიამოვნებებსა და უხერხულ სიტუაციებს უქადდა. 1971 წელს პოლიციამ დააკავა, როცა სავსებით სერიოზულად ცდილობდა... საზიზღარი გამონაბოლქვის გამო მანქანის მძღოლის დაკავებას. მაშინ “სერპიკოში” პოლიციელს თამაშობდა და, უბრალოდ, ვერ მოასწრო როლიდან გამოსვლა.

ალ პაჩინო – მეტსახელად ’’ეშმაკი’’ჯუჯა, გენიოსი
1962 წელს ნიუ-იორკის საბავშვო თეატრში დებიუტი შედგა. ალ პაჩინო (ერთხანს ფიქრობდა, ხომ არ აერჩია ფსევდონიმი სონი სკოტი, რადგან იტალიური გვარის რცხვენოდა) სრულიად ათასნაირ დადგმაში მონაწილეობდა – საბავშვო ღონისძიებებიდან დაწყებული ბროდვეული მიუზიკლებითა და სერიოზული პიესებით დამთავრებული.

პირველი კარგი ჰონორარი 25 წლისამ აიღო. ”წავედი ბარში, შევუკვეთე მარტინი და ბიფშტექსი – მანამდე თავს ერთდროულად ჭამისა და სმის უფლებას არასდროს ვაძლევდი. ყველაზე საინტერესო ისაა, რომ მას შემდეგ ჯიბეში ფული აღარ გამომლევია”. დღეს მისი საშუალო ფსონი - 10 მილიონია ერთი სურათისთვის.

60-იანების ბოლოს ალ პაჩინომ რამდენიმე პრესტიჟული თეატრალური პრემია ერთდროულად მიიღო. მასზე ალაპარაკდნენ. მალე ჰოლივუდში მიიწვიეს. პირველი ეკრანული გამოცდილება (”მე, ნატალი”, 1969 წ., ”პანიკა ნიდლ-პარკში”, 1971 წ.) ძალიან განსხვავდებოდა სცენაზე სიღრმისეული თამაშისგან, რომელმაც დიდება, მაყურებლისა და კრიტიკოსების პატივისცემა მოუტანა.

თუმცა, კინო მაინცდამაინც არ იზიდავდა მსახიობს, რომელიც პატივმოყვარულ ფიქრებს მხოლოდ სცენას უკავშირებდა. უცნაური არაა, რომ სრულიად უცნობი ახალგაზრდა რეჟისორის წინადადება, მაფიის ნათლიმამა ეთამაშა, ძალიან გულგრილად მიიღო. როლზე მორგებას ისეთი ტიტანები ცდილობდნენ, როგორებიც არიან რობერტ რედფორდი, უორენ ბიტი, ჯეკ ნიკოლსონი, რაიან ო ნილი, რობერტ დე ნირო...

თუმცა რეჟისორ ფრენსის ფორდ კოპოლას არავინ აწყობდა ისე, როგორც სულ ორ ფილმში გადაღებული ალ პაჩინო. მაგრამ... კინოსტუდია “პარამაუნტის” ხელმძღვანელობამ კანდიდატურაზე გადაჭრით თქვა უარი. პროდიუსერებს აშფოთებდათ კინოსამყაროში პაჩინოს უცნობი სახელი და მისი მცირე გაბარიტები: სიმაღლე - 160 სმ. ყოვლისშემძლე მაფიოზისთვის არაა საკმარისიო. გადაღება ჯერ არ დაუწყია და უკვე შეიძინა სტუდიურ კულუარებში მეტსახელი “ჯუჯა”. პაჩინო თვლიდა, რომ ასეთ პირობებში როლისთვის ბრძოლა უაზრობაა, ამიტომ სინჯებზე ისე მოდიოდა, ტექსტიდან ერთი სტრიქონიც არ იცოდა.

თვალებისთვის კოპოლამ თავის ფავორიტს “გენიოსი” შეარქვა და ბოლოს დაიცვა ალფრედო. როლი სწორედ ალ პაჩინოს ერგო. რეჟისორს სწორედ ასპროცენტიანი იტალიელი სჭირდებოდა.

”ამერიკაში ყველა, ვინც თავს იტალიელად ასაღებს, სანახევროდაა იტალიელი, ჩემ გარდა. ჩემს შემთხვევაში გაუზავებელ ხსნარს იღებთ”. მსახიობის წინაპრები ემიგრაციაში სიცილიიდან გაემგზავრნენ, თანაც ქალაქიდან, რომელსაც კორლეონე ჰქვია. დამთხვევაა? რა თქმა უნდა

)

ალ პაჩინო – მეტსახელად ’’ეშმაკი’’ალ პაჩინო – მეტსახელად ’’ეშმაკი’’

გადაღებების დროს პაჩინომ თავისი ცხოვრების როლი რამდენიმეჯერ კინაღამ დაკარგა. ჯერ იყო და გაირკვა, რომ ასპროცენტიანმა იტალიელმა თავისი წინაპრების ენაზე ლაპარაკი არ იცოდა. არა უშავს, იპოვეს მთარგმნელი. მერე აღმოჩნდა, რომ ვალსი არ იცის. არაფერია, იქირავეს ცეკვის მასწავლებელი. მაგრამ როცა დარწმუნდნენ, რომ 20 წელზე მეტი წლის კაცი მანქანის საჭესთან არასდროს მჯდარა, კოპოლამ თავში ხელი იცა. უმარტივესი ეპიზოდის გადასაღებად (ახალგაზრდები ავტომობილით ქორწილიდან ბრუნდებიან) დუბლიორი დასჭირდათ.

მეწამული კედლები
”ნათლიმამისთვის” და ”ნათლიმამა-2”-სთვის ალ პაჩინო პირველად წარადგინეს “ოსკარზე”. ჰოლივუდის ვარსკვლავების პირველ ეშელონში ამოყო თავი. ერთი ბრწყინვალე როლი მეორეს მოჰყვა. მაყურებელი მხოლოდ მის სანახავად მიდიოდა კინოთეატრში. სალარო ივსებოდა. როლებში გაბედული არჩევანისთვის კრიტიკოსები ქებას არ აკლებდნენ. კიდევ უფრო გაბედული იყო უარი ფილმებზე: ”ლამაზმანი”, ”4 ივლისს დაბადებული”, ”კრამერი კრამერის წინააღმდეგ”, ”აპოკალიფსი დღეს”, ”ვარსკვლავური ომები”... ასეთი როლებისთვის ზურგის შექცევა მხოლოდ საკუთარ თავში ძალიან დარწმუნებულ ადამიანს თუ შეუძლია.

ალ პაჩინო – მეტსახელად ’’ეშმაკი’’ალ პაჩინო – მეტსახელად ’’ეშმაკი’’თუმცა ასეთ რამეს ბედი იშვიათად პატიობს ადამიანს. 1982 პაჩინოს ”რიჩარდ III” ჩავარდა. კრიტიკოსები ხუმრობდნენ: ”რიჩარდს - 3, პაჩინოს - 0”. მერე კი “რევოლუცია” დაიწყო (1985). ეს ფილმი კინემატოგრაფის ისტორიაში ერთ-ერთ ყველაზე ცუდ ფილმად შევიდა, ხოლო კრიტიკოსების გამოხმაურება, უბრალოდ, ცუდი კი არა, ბოროტი იყო. პაჩინო 4 წლით ჩაიკეტა თავის ნიუ-იორკულ ბინაში, ყველა კედელი მეწამულისფრად შეღება. შემოქმედებითი გამყინვარების დიზაინერული შედეგის ლიკვიდაციას მოგვიანებით 2 მილიონი დოლარი დასჭირდება.

ნებაყოფლობითი განდეგილობის დროს პაჩინომ თავი რეჟისორად მოსინჯა, საკუთარი ფულით გადაიღო “სირცხვილით დადაღული”, რომელიც არავის უნახავს. ფირი დაბრონილ სეიფში შეუნახავს და უახლოესი მეგობრებისთვისაც არ აჩვენებია.

მოთმინების ჩემპიონი
კინოში დაბრუნების საბაბი უცნობთან ნიუ-იორკის პარკში შეხვედრა გახდა: ”ეი, კი, მაგრამ რა დაგემართათ? მოგვენატრეთ. დაბრუნდით!” – მის გვერდით მომღიმარი ბიჭი გაჩერებულა. ”ამ მომენტში, მივხვდი, - იხსენებს პაჩინო, - რაღაცისთვის ხომ მერგო მსახიობის ნიჭი?!”

ალ პაჩინო – მეტსახელად ’’ეშმაკი’’ალ პაჩინო – მეტსახელად ’’ეშმაკი’’

ძალიან მალე, ყველას გასაკვირად, გამოჩნდა კომედიაში ”დიკ ტრეისი”, რომლისთვისაც “ოსკარზე” მომდევნო ნომინაცია მიიღო. იმ დროისთვის ალ პაჩინოს შემოქმედებით ბიოგრაფიაში უკვე 5 ნომინაცია იყო და არა ჯილდო. მხოლოდ მეშვიდე ცდაზე გაუმართლა, ფილმისთვის “ქალის სურნელი”. სწორედ ამ სურათის გადაღებისას მიიღო პაჩინომ მეტსახელი “ეშმაკი”. თუმცა, ამბობენ, მსახიობის ხასიათთანაც შეიძლება ამ მეტსახელის შეფარდებაო.

მავნე ჩვევები და სასაცილო ბალიშები
პაჩინოს ტკბილი ხასიათი მართლა არ აქვს. ამას თავადაც აღიარებს და ასე ხსნის: ”ნამდვილი მსახიობი ემოციონალურ ათლეტად გადაიქცევა. ეს პროცესი მტკივნეულია და აუცილებლად ასვამს დაღს პიროვნებას”.

კინემატოგრაფის ვეტერანისგან უმცროს კოლეგებსაც ხვდებათ. “ეშმაკის ადვოკატის” (1997) გადაღებებზე თავისი ვაგონის კიანუ რივზისგან შორს გადატანა მოითხოვა – აქაოდა, მუსიკის გამაყრუებელი ხმა მაწუხებსო.

სინამდვილეში მეტრმა ამ “ძუძუმწოვარაზე”გული იმიტომ აიყარა, რომ უკანასკნელმა გადასაღებ მოედანზე მის მამობრივ დარიგებებს არ უგდო ყური.

ალ პაჩინო – მეტსახელად ’’ეშმაკი’’

თავიდან დაძაბული იყო ურთიერთობა ჯონი დეპთანაც (ერთად თამაშობდნენ “დონი ბრასკოში”). მაგრამ დეპმა ყინული გაადნო, ერთხელ ალ პაჩინოს სასაცილო ბალიში დაუდო. ასეთზე რომ ჯდები, ისეთ ბგერებს გამოსცემს, როგორც ნაწლავური გაზები. იაფფასიანი და გავრცელებული ხუმრობაა, მაგრამ პაჩინო ბავშვივით ხარხარებდა: ასეთ რამეებზე წარმოდგენაც არ ჰქონდა. სხვას რას უნდა ელოდო კაცისგან, რომელიც საუკეთესო გასართობად ოპერაში სიარულს და შექსპირის წაკითხვას თვლის?!

მთელი სია ჩაიკითხეთ, გეთაყვა!
”მამაჩემმა 5-ჯერ მოიყვანა ცოლი. მე – არც ერთხელ.” ჰო, დაქორწინების ჩვევა პაჩინოს არ აღმოაჩნდა, ასე ჩანს მისი ცხოვრების 73 წლის მიხედვით. თუმცა არც ერთი თავისი პარტნიორი ხელიდან არ გაუშვია. არადა, ფილმოგრაფიაში – 46 ერთეული ითვლება. პაჩინოს დონჟუანური სია ამერიკული ფილმების დამამთავრებელ ტიტრებს ჰგავს. მსახიობების ნუსხიდან მხოლოდ მისი 23 წლის ქალიშვილის, ჯულის დედას არ აქვს კინოსთან კავშირი, თუმცა დრამატულ ხელოვნებას კი ასწავლის.

ალ პაჩინო – მეტსახელად ’’ეშმაკი’’ორი ბამბინო ალ პაჩინოს
ერთხელ პაჩინომ თავისი დაუქორწინებლობის აღთქმა ბევერლი დი ანჯელოს – მსახიობის, ტელეარხის მფლობელის ქალიშვილის, იტალიელი ჰერცოგის ექსმეუღლის - გამო კინაღამ დაარღვია. 90-იანების დასასრულს ჭორი გავრცელდა – პაჩინოს ცოლი მოჰყავსო. მაშინ პლასტიკური ოპერაციაც გაიკეთა. ბევერლიმ ბობოქარი რომანიდან 2 წლის თავზე ტყუპები – ანტონი და ოლივია გააჩინა.

ძალიან მალე დაშორდნენ და ტყუპები მაშინვე ყურადღების ცენტრში აღმოჩნდნენ: დედა და მამა მთელი მსოფლიოს დასანახად იყოფდნენ ბავშვებს. უსიამოვნო სასამართლო პროცესს ერთი წელი არ ეყო. პაჩინო ითხოვდა, უფრო მეტი დრო მიეცათ ბავშვების სანახავად. დ ანჯელოს ყოველი დამატებითი საათისთვის ცალკე გასამრჯელო სურდა. მსახიობის ადვოკატი არცთუ მხიარულად ხუმრობდა: ”როგორც ჩანს, ბავშვების იჯარით გაცემის ფირმას ვებრძვით”. 2004 წლის გაზაფხულისთვის თითქოს მოილაპარაკეს: მსახიობს თავისი იტალიელი არისტოკრატისთვის 35 ათასი დოლარი ალიმენტი უნდა გადაეხადა და 18 ათასი დოლარი საიჯარო გადასახადი ნიუ-იორკის ბინისთვის.

* * *
დღეს პაჩინო სცენაზე ძველებურად ბევრს თამაშობს, მაგრამ ცოტა ფილმშია. კოპოლამ ბრალი დასდო ფავორიტს, ქონი მოიდო და სერიოზული როლების ეშინიაო. დამატებით, ძუნწიც უწოდა: “პაჩინოს ამდენი ფული იმიტომ აქვს, რომ არასდროს ხარჯავსო”. რაზეც პაჩინო პასუხობს: “რაც უფრო ცუდი სცენარია, მით მეტია ჰონორარი. ვინ გაუძლებს?”. ასეთია შოუ-ბიზნესის კანონი.

მასალა მოამზადა სოფო გულიაშვილმა

eva.ge

[Pasuxi][Cit]|