ქართველი ლეგიონერები

9. Dstori (Off)
[ 15 Sep 2013, 2:22 ]
პოლონეთში ჰეთ-თრიქი შეასრულა ლადო დვალიშვილმა, კერძოდ, “კორონა” - “ლეგიას” შეხვედრაში, რომელიც ვარშაველებმა 5:3 მოიგეს. ლადომ პირველი ტაიმის შუაში, მეორე ნახევრის დასაწყისში და შემდეგ, 70-ე წუთზე მიითვალა გოლები.

7 მატჩი, 5 გოლი - ასეთია დვალიშვილის შედეგიანობა მიმდინარე ექსტრაკლასაში და “ვიძევის” ლატვიელ ფორვარდ ვიშნიაკოვსთან ერთად ლიდერობს ბომბარდირთა დავაში. “ლეგია” პირველ ადგილზეა.

ქართული გოლი გავიდა სომხეთში, სადაც “განძასარის” შემტევმა ნახევარმცველმა შოთა ჯიქიამ გაუტანა “ალაშკერტს”. და ანგარიშს არ იკითხავთ? ჯიქიას გუნდმა 9:2 მოიგო.

იტალიის სერია B-ში “ემპოლიმ” გასვლაზე 2:0 მოუგო “კარპის” და 4 ტურის შემდეგ, 10 ქულით ლიდერობს. ლევან მჭედლიძემ ბოლო 22 წუთი ითამაშა, ხოლო ირაკლი შეყილაძე განაცხადში არ გახლდათ.

გერმანიის III ლიგაში ლუკა ჰუფნაგელის “უნტერჰახინგმა” გასვლაზე 3:2 სძლია “მიუნსტერს’ და 9 ტურის შემდეგ, მერვე ადგილზეა. ჰუფნაგელმა შეუცვლელად ითამაშა.

ჯანო ანანიძემ 82 წუთი ითამაშა ცსკა-“როსტოვის” შეხვედრაში, რომელიც მოსკოველებმა 1:0 მოიგეს. ქართველმა ნახევარმცველმა აქტიურად ვერ ითამაშა. მხოლოდ ერთხელ 65-ე წუთზე დაემუქრა სტუმართა კარს და ააცილა. “როსტოვი” მეოთხე ადგილზეა.

ალეკო ამისულაშვილის “კრილიამ” სტუმრად 1:1 ითამაშა “კრასნოდართან”. საქართველოს ნაკრების მცველი ყოფილი გუნდის წინააღმდეგ შეუცვლელად გაისარჯა. “კრილია” მე-11 საფეხურზეა.

უკრაინაში “ილიჩივეცმა” 1:0 აჯობა “ზორიას”. თორნიკე ოქრიაშვილმა შეუცვლელად ითამაშა და ერთ მომენტში გოლის გატანაც შეეძლო, თუმცა ჩაწოდებულ ბურთს ოდნავ ვერ მისწვდა. დავით თარგამაძე განაცხადში იყო, თუმცა მინდორზე არ შეუყვანიათ. რაც შეეხება “ზორიას” ნახევარმცველ ჯაბა ლიპარტიას, ის 54-ე წუთზე შევიდა და საკმაოდ აქტიური იყო: ბოლო წუთებში კი “ილიჩივეცის” მეკარემ სასწაული ბურთი მოიგერია მისი დარტყმის შემდეგ. მარიუპოლის კლუბი მეშვიდეზეა, “ზორია: კი - მერვეზე.

“ვორსკლა”-‘სევასტოპოლი” 2:2 დასრულდა. სტუმართა მცველმა მათე ღვინიანიძემ შეუცვლელად ითამაშა. სევასტოპოლელები მე-11 ადგილზე არიან
[worldsport.ge]
[Pasuxi][Cit]|

10. Dstori (Off)
[ 16 Sep 2013, 21:53 ]
ქართველი ლეგიონერების ჰეთ-თრიქი ბოლო წლებში ნოემბრის თოვლივით იშვიათობა გახდა. ამიტომაც იყო ორმაგად აღსანიშნავი ლადო დვალიშვილის მიერ გატანილი 3 გოლი "კორონა"-"ლეგიას" სეხვედრაში, რომელიც ვარშაველებმა 5:3 მოიგეს. დვალიშვილმა ორი თვის წინაც შეასრულა ჰეთ-თრიქი, თუმცა ეს ავსტრიულ "რიდთან" ამხანაგურში (3:3) მოხდა, დღეს კი ოფიციალურ მატჩებზე დავწერთ.

უცხოეთის სხვადასხვა უმაღლესი ლიგები რომ ჩამოვთვალოთ, ბოლო 2 წელიწადში ბევრ ქართველ ჰეთ-თრიქოსანს ვერ ნახავთ. პოლონეთის დარ ლიგაში კი, მითუმეტეს.

ზაქარია ბეგლარიშვილი:

2011: "აიაქს სალამაიე" - "ფლორა" 0:11. 4 გოლი

2012: "პაიდე" - "ფლორა" 0:5. 3 გოლი

2012: "ფლორა" – "კალევი" 5:0. 3 გოლი

მამუკა ღონღაძე

2011: "მეტალურგსი" – "დაუგავპილსი" 1:3. 3 გოლი

2012: "დაუგავპილსი" – "დაუგავა" 3:1. 3 გოლი

გიორგი ადამია

2011: "ყარაბაღი" – "ნეფთჩი" 3:0. 3 გოლი

დავით ჩაგელიშვილი

2012: "ასტანა" – "ოკჟეპტესი" 1:4. 3 გოლი

ბაჩანა ცხადაძე

2013: "რავანი" – "ინტერი" 1:5. 3 გოლი

დვალიშვილს რაც შეეხება, როგორც იცით, "პოლონიასა" და "ლეგამდე" ისრაელის თელ ავივის "მაკაბიში" გამოდიოდა, საკმაოდ ბევრი გაჰქონდა, თუმცა ჰეთ-თრიქი არ მიუთვლია. სამაგიეროდ, ლატვიაში, "სკონტოში" თამაშისას ორი ჰეთ-თრიქი და ერთი პოკერი აქვს გახერხებული.

აქ უმაღლესი ლიგებია ჩამოთვლილი, თორემ ქვედა ლიგაში თუნდაც ოთარ მარცვალაძეს აქვს ჰეთ-თრიქები, თანაც, სამჯერ.

საწყენია, მაგრამ რუსეთის პრემიერლიგაში ბოლო ქართული ჰეთ-თრიქი 1999 წელს შესრულდა: გიორგი დემეტრაძემ "ალანია"-"ურალანის" შეხვედრაში (4:2) მიითვალა. "დემეს" კიდევ კიდევ 2 "სამგოლიანი" აქვს შესრულებული – "კრილიასთან" 5:0 და ნოვოროსიისკის "ჩერნომორეცთან" 3:1 მოგებულ მატჩებში. ასევე, რუსეთში ჰეთ-თრიქი გაახერხეს გოჩა გოგრიჭიანმა ("ჟემჩუჟინა"-"კრილია" 3:1) და ზაზა ჯანაშიამ ("ლოკომოტივი"-"ჟემჩუჟინა" 4:1).

რადგან დემეტრაძეზე ვთქვით, მის მიერ უკრაინაში შესრულებული პოკერიც გამოვარჩიოთ, რომელიც "ნივასა" და კიევის "დინამოს" შეხვედრაში (3:7) მიითვალა. უკრაინაში ორჯერ გაუკეთებია ჰეთ-თრიქი მიხეილ ფოცხვერიას და თან, ორივეჯერ "ნივას" წინააღმდეგ. ფოცხვერიამ ეს ჯერ ზაპოროჟიეს 'მეტალურგის", შემდეგ კი დონეცკის "შახტარის" მაისურით მოახერხა. სხვათა შორის, ფოცხვერია პირველი უცხოელი იყო, რომელმაც ეს მოახერხა...

ცხონებულმა შალვა აფხაზავამ 2002 წელს "არსენალი"-"ვოლინის" მატჩში (8:1) გაიტანა სამჯერ. ბოლო 11 წელია, უკრაინაში ქართველს ჰეთ-თრიქი არ გაუკეთებია.

სხვა გამოსარჩევი ამბები: ერთადერთი ქართველი ფეხბურთელი, რომელსაც დიდი ოთხეულის ჩემპიონატში ჰეთ-თრიქი შეუსრულებია, გახლავთ ალექსანდრე იაშვილი. ეს მოხდა 2003 წლის 8 ნოემბერს, როცა "ფრაიბურგმა" 3:2 სძლია "ვოლფსბურგს". მეორე დღეს კი გერმანული ჭელტ-ი წერდა: "არავითარი დალესანდრო! იაშვილი!". ანდრეს დალესანდრო იმ დროს არგენტინის ერთ-ერთ ამომავალ ვარსკვლავად ითვლებოდა და "ვოლფსბურგში" მისი გადაყვანა დიდ სენსაციად შეფასდა.

თემურ ქეცბაიას "ანორთოსისის" მაისურით ტურინის 'იუვენტუსის" კარშიც გაუტანია გოლი, ხოლო უშუალოდ ჰეთ-თრიქს რაც შეეხება, 2006 წელს 9-წუთიან მონაკვეთში გაახერხა ლიმასოლის აელ-თან. იმ დროს ქეცბაია "ანორთოსისის" მოთამაშე-მწვრთნელი გახლდათ.

ქართველი ლეგიონერებიდან ყველაზე ხშირად ჰეთ-თრიქებს შოთა არველაძე ასრულებდა და უნიკალურიაიმ მხრივ, რომ მსგავსი მიღწევა ოთხ სხვადასხვა ქვეყანაში (საქართველო, თურქეთი, ჰოლანდია, შოტლანდია) ჰქონია. არველაძეს ევროტურნირებიც არ დაუტოვებია ჰეთ-თრიქის გარეშე, კერძოდ, "აიაქსში" თამაშისას სლოვენიურ "მარიბორს" გაუტანა 3 გოლი.

თუმცა, ქართველი ლეგიონერებიდან ყველაზე ფასეული და ხმაურიანი ჰეთ-თრიქის გასახსენებლად ნახევარი წუთიც არაა საჭირო. ეს ჩემპიონთა ლიგაში იყო და იმიტომ... ლევან კობიაშვილმა 2005 წლის 24 ნოემბერს "შალკე"-პსვ-ის შეხვედრაში ორი პენალტი გაიტანა და ერთიც ხარიხიდან ასხლეტილ ბურთს დაამატა – 3:0 მოიგეს "ხუმარებმა".

კიდევ როდის მოხდება, რომ ქართველი ჩემპიონთა ლიგაში ერთ მატჩში სამჯერ გაიტანს? გოლებამდე იქ მოხვედრაა საჭირო
[worldsport.ge]
[Pasuxi][Cit]|

12. Dstori (Off)
[ 23 Sep 2013, 8:58 ]
ლევან კობიაშვილმა თითქმის წელიწადნახევრიანი შესვენების შემდეგ ითამაშა ბუნდესლიგაში. 36 წლის ქართველმა ამ სეზონში პირველი ოფიციალური მატჩი ჩაატარა "ჰერტაში" და თანაც, ნაცნობ გარემოში – ფრაიბურგის სტადიონზე. რა შეხსენება გინდათ, ლევანი წლების განმავლობაში თამაშობდა "ფრაიბურგში" და დღესაც ითვლება ყველა დროის ერთ-ერთ საუკეთესო ფეხბურთელად.

"ფრაიბურგი"-"ჰერტა" 1:1 დასრულდა, "კობი" კი მე-20 წუთზე ტრავმირებული ბრუკსის ნაცვლად შევიდა. "ჰერტა" ცხრილის შუაში, მეათე ადგილზეა. ზოგადად, ეს ქართველის 337-ე მატჩი იყო ბუნდესლიგაში და ამ მაჩვენებლით მეორე ადგილზეა უცხოელთა შორის. საუბარია ყველა დროის ლეგიონერთა შორის ბუნდესმატჩების რაოდენობაზე. "ბაიერნის" პერუელ კლაუდიო პიზაროს კი 355 აქვს.

დანიაში "ორჰუსმა" შინ 1:3 წააგო "ბრონდბიუსთან" და მეხუთე ადგილზეა. ქართველთაგან მხოლოდ მათე ვაწაძემ ითამაშა, ისიც ბოლო 25 წუთი. დავით დევდარიანი და დავით სხირტლაძე განაცხადში არ იყვნენ.

ვარშავის "ლეგიამ" შინ 2:1 სძლია "გურნიკს" და 3-ქულიანი ჰანდიკაპით ლიდერობს. ლადო დვალიშვილს არ უთამაშია, რადგან მციორე ტრავმა აწუხებს და ამის გამო ევროპის ლიგის შეხვედრაც გაუცდა.

რუსეთში ჯანო ანანიძის "როსტოვმა" ვერაფერი გაახერხა "ზენიტთან" და შინ 0:4 წააგო. ქართველი ნახევარმცველი სასტარტოში იყო და 68-ე წუთზე შეცვალეს. "როსტოვი" მშვენიერი სტარტის შემდეგ ცხრილში ქვემოთ ეშვება: მეექვსეზეა.

ყაზანის "რუბინმა" შინ მოულოდნელად 1:2 წააგო "ტომთან" და მეცხრე საფეხურზეა. მასპინძელთა სათადარიგოებში საბა კვირკველია გახლდათ, თუმცა არ უთამაშია.

რუსეთის პირველ დივიზიონში 'ალანიამ" შინ 2:1 დაამარცხა "ენისეი". ოთარ მარცვალაძემ 66-ე წუთამდე ითამაშა, ხოლო გოჩა ხოჯავა სათადარიგოებში გახლდათ. "ალანია" მეორე ადგილზეა.

ნალჩიკის "სპარტაკმა" სტუმრად 2:3 წააგო "ხიმიკთან" და ბოლოდან მესამე პოზიციაზეა. ნალჩიკელთაგან დავით სირაძემ ბოლო 15 წუთი ითამაშა, ხოლო გუჯა რუხაია მინდორზე არ შეუყვანიათ.

უკრაინაში "დნიპრომ" გასვლაზე 3:2 აჯობა ზაპოროჟიეს "მეტალურგს", მეორე ადგილზეა და 3 ქულით ჩამორჩება ლიდერ "მეტალისტს". ჯაბა კანკავა დისკვალიფიცირებული გახლდათ, ხოლო სანდრო კობახიძე სათადარიგო იყო და მინდორზე არ შეუყვანიათ.

ჯაბა ლიპარტიას "ზორიამ" ოდესაში "ჩერნომორეცთან" 1:3 წააგო. ლიპარტია სასტარტოში იყო და 64-ე წუთზე შეცვალეს. "ზორია" მეათე ადგილზეა.
[Pasuxi][Cit]|

14. Dstori (Off)
[ 23 Sep 2013, 21:26 ]
გერმანიის ყველაზე პოპულარულ სპორტულ გამოცემა Kicker-ში ლევან ყენიაზეა მცირე ჩანახატი გამოქვეყნდა. “ფორტუნას” მწვრთნელ მაიკ ბიუსკენსის სიტყვებიცაა მოყვანილი, რომელიც ამბობს, რომ 22 წლის ქართველი მის გუნდს კომპაქტურობასა და შემოქმედებით სახეს აძლევს.

“ბურთით ის საუკეთესოა. შეგიძლიათ თუნდაც შუაღამეს გააღვიძოთ და ითამაშებს” - ამბობს ბიუსკენსი.

გამოცემა წერს, რომ ყენია “ფორტუნას” მთავარი იმედია.

“ის რისკიანად თამაშობს. არასტანდარტულ გადაწყვეტილებებს იღებს და ხშირ შემთხვევაში, მისი მოქმედებები არათუ მეტოქის, არამედ თანაგუნდელებისთვისაც მოულოდნელია” - წერს Kicker-ი.

დიუსელდორფის “ფორუნას” დღეს საღამოს II ბუნდესლიგის მერვე ტურის მატჩი ელის, ჰამბურგში “ზანქტ პაულის” ესტუმრება და ყენიაც ითამაშებს. ყენიამ წინა ტურში, დრეზდენის “დინამოსთან” მხოლოდ ბოლო 14 წუთი ითამაშა, რადგან მანამდე მცირე ტრავმა ჰქონდა და მოუმზადებელი გახლდათ.
[Pasuxi][Cit]|

15. Dstori (Off)
[ 23 Sep 2013, 21:27 ]
ქართველი გიორგი ილურიძე ხორვატიის ჩემპიონატის ტურის სიმბოლურ ნაკრებში მოხვდა Jutarnjhi-ს ვერსიით. როგორც იცით, სპლიტის “ჰაიდუკმა” გასულ ტურში 1:0 სძლია “ზადარს” და ეს ერთადერთი გოლი მე-10 წუთზე ქართველმა ნახევარმცველმა გაიტანა.

“ყურადღებას იქცევს ქართველი ილურიძე. ის იმიტომაც მოიყვანეს “ჰაიდუკში”, რომ შეუძლია მატჩის ბედის გადაწყვეტა და ვინ იცის, იქნებ ჩემპიონობისაც. მას ორიგინალური მოქმედებები აქვს და შეუძლია “ჰაიდუკის” ჯოკერი გახდეს. სწორედ ასეთი ფეხბურთელი აკლდა გუნდს. ქართველი სახიფათოა მეტოქის კარიდან 20 მეტრის დაშორებით, იქიდან ბევრ ხიფათს ქმნის” - წერს ხორვატული გამოცემა.

შეხსენებისთვის, “ჰაიდუკი” ამჟამად მეორე ადგილზეა და მხოლოდ ერთი ქულით ჩამორჩება ზაგრების ‘დინამოს”.
[Pasuxi][Cit]|