ქართველი ლეგიონერები

33. Dstori (Off)
[ 03 Oct 2013, 13:57 ]
რუსულმა საიტმა onedivision.ru-მ პირველი დივიზიონის გასული ტურის საუკეთესო მცველად აკაკი ხუბუტია დაასახელა. "მორდოვიამ" შინ 1:0 სძლია "სალიუტს", პირველ ადგილზეა და პრემიერლიგაში დაბრუნება სურს. საქართველოს ნაკრების მცველმა "სალიუტთან" შეუცვლელად ითამაშა.

"საკვირველი არაა, რომ "მორდოვია" ლიდერია, რადგან გუნდმა გასული სეზონის შემდეგ, ბირთვი შეინარჩუნა. დღევანდელი "მორდოვიას" ერთ-ერთი ლიდერი აკაკი ხუბუტიაა, რომელიც თავდაჯერებულია და "სალიუტთან" მატჩში იპყრობდა ყურადღებას. ქართველი მცველი საჯარიმოს ბატონ-პატრონი იყო და მისი დიდი დამსახურებაა, რომ სარანსკელებმა კარი მშრალად შეინახეს. ჩვენი აზრით, ხუბუტია დღესდღეობით პირველი დივიზიონის საუკეთესო მცველია" – წერს საიტი.
[Pasuxi][Cit]|

34. Dstori (Off)
[ 03 Oct 2013, 14:08 ]
უეფას ევროპის ლიგის ჯგუფური ეტაპის მე-2 ტურში კვიპროსულ “აპოლონთან” მატჩამდე გამართულ პრესკონფერენციაზე, ვარშავის “ლეგიას” მთავარმა მწვრთნელმა იან ურბანმა განაცხადა, რომ ვლადიმერ დვალიშვილის სათამაშო ფორმაზე არ ნერვიულობს.

“მის სათამაშო ფორმასთან დაკავშირებით მშვიდად ვარ. თუ გვინდა, რომ შემდეგ ეტაპზე გავიდეთ, უნდა გავიმარჯვოთ. არაა საჭირო ყურადღების გამახვილება იმაზე, თუ ვინ დაგვაკლდა. ეს, ჩემთვის ახალი სიტუაცია არაა. ასეთი რამ ადრეც ყოფილა და ტრავმირებულების შემცვლელები მოგვიძებნია. სხვებიც არანაკლებ თამაშობენ”, – იუწყება ურბანის სიტყვებს პოლონური ინტერნეტგამოცემა სპორტ.პლ-ი.

“მწყობრში ვარ და თამაში შემიძლია. თუმცა, რა თქმა უნდა, მწვრთნელი გადაწყვეტს სასტარტო შემადგენლობაში დამაყენებს, თუ არა”, – თქვა დვალიშვილმა, რომელმაც პირველ ტურში რომში “ლაციოს” წინააღმდეგ იმიტომ ვერ ითამაშა, რომ მატჩამდე გამართულ ვარჯიშზე ბარძაყის კუნთი დაეჭიმა.

სხვათა შორის, “ლეგიას” შეტევის ხაზში შექმნილი მდგომარეობიდან გამომდინარე, დვალიშვილს სასტარტო შემადგენლობაში დამკვიდრების კარგი შანსი აქვს. საქმე ისაა, რომ ქართველის მთავარმა კინკურენტმა მარეკ საგანოვსკიმ, მუხლის ტრავმა მიიღო და 6 თვე ვერ ითამაშებს. მიქაელ ეფირმა, რომელიც “ლეგიას” აკადემიაშია აღზრდილი და ერთ-ერთ ნიჭიერ ფეხბურთელად ითვლება, ჯვარედინი მყესები დაიზიანა. რაც შეეხება 20 წლის ფორვარდ პატრიკ მიკიტას, ეს უკანასკნელი ჯანმრთელია, მაგრამ გამოცდილება არ ჰყოფნის.
[Pasuxi][Cit]|

35. Dstori (Off)
[ 03 Oct 2013, 18:26 ]
პორტუგალიის პრიმეირალიგაში მოასპარეზე “ჟილ ვისენტეს” შემტევ ნახევარმცველ ავთანდილ ებრალიძეს, რომელსაც 3 ოქტომბერს 22 წელი შეუსრულდა, ინტერნეტგამოცემა maisfutebol.iol.pt-მა საკმაოდ ვრცელი სტატია მიუძღვნა.

“ეს არის ქართველი ბიჭის ისტორია, რომელიც პორტუგალიაში მშობლებთან ერთად ემიგრაციაში ჩამოვიდა და პრიმეირალიგაში თამაშობს. სექტემბრის თვე ავთოსთვის, უფრო სწორედ, ავთანდილ ებრალიძისთვის, ემოციებით აღსავსე არმოჩნდა. კერძოდ, “ოლივეირენსედან” “ჟილ ვისენტეში” გადასვლიდან ორი კვირის შემდეგ, მას სტადიონ “დრაგაუზე” დებიუტი “პორტუსთან” ჰქონდა.
ავთანდილ ებრალიძე თბილისში, საქართველოს დედაქალაქში, 22 წლის წინ დაიბადა. პორტუგალიაში 16 წლის ასაკში, მშობლების თანხლებით ჩამოვიდა.

“მამაჩემი პორტუგალიაში, ქალაქ ლაგოსში სამუშაოდ ჩამოვიდა. შემდეგ, მე და დედა ჩამოვედით და თამაში “ლაგოს დე ესპერანსას” ახალგაზრდულ გუნდში დავიწყე”, – უთხრა ებრალიძემ maisfutebol.iol.pt-ს.

შემდეგ, მან “ლაგოს დე ესპერანსადან”, არცთუ ხანგრძლივი პერიოდით, ესპანეთის “ხეტაფეს” ახალგაზრდულ გუნდს მიაშურა.

“ხეტაფეს” ახალგაზრდულ გუნდში ვთამაშობდი, ხოლო პორტუგალიაში დაბრუნების მერე, “ლაგოს დე ესპერანსას” პირველ გუნდში ჩავირიცხე”,- თქვა ავთომ.

ავთოს კარიერაში აღმასვლა დაიწყო და “ესპერანსადან” ლაგოსის “ჟუვენტუდ ევორაში” მოხვდა. ამ გუნდიდან “ოლივეირენსეს” მიაშურა, სადაც “ჟილ ვისენტეში” გადასვლამდე გამოდიოდა.

“პრიმეირალიგაში თამაშზე ყოველთვის ვოცნებობდი. ვიცოდი, რომ უნდა მემუშავა და ბოლომდე რწმენა მქონოდა”, – განაცხადა მან.

ახალ გუნდში მას დებიუტი “პორტუსთან”, სტადიონ “დრაგაუზე” ჰქონდა, რაც ფეხბურთელისთვის დაუვიწყარია.

“ეს დაუჯერებელი რამ იყო. თითქოს სიზმარში მოვხვდი. ძალიან კარგი თამაში გამოვიდა და ოცნებაც ავიხდინე. ძალიან ძლიერი შთაბეჭდილებების ქვეშ ვიყავი”, – გაიხსენა ავთომ.

“ჩემი მიზანია, რომ იმდენი ვითამაშო, რამდენის შესაძლებლობაც მექნება, რათა გუნდს საგოლე პასებითა და გატანილი გოლებით დავეხმარო, რომ “ჟილ ვისენტემ” პრიმეირალიგაში ადგილი შეინარჩუნოს. არ ველოდები, რომ ყოველთვის ვითამაშებ, მაგრამ იმედია, საკუთარი შესაძლებლობების უკეთესად წარმოჩენის შანსი, მექნება”,- აღნიშნა 22 წლის შემტევმა.

ებრალიძეს იმედი აქვს, რომ დადგება დღე და, საქართველოს ეროვნულ ნაკრებში გამოიძახებენ:

“საქართველოს ნაკრებში თამაში მსურს. თუ აქ ბევრ მატჩს ჩავატარებ და მოვითმენ, ვფიქრობ, შესაძლოა, შანსი მომცენ. მშვიდად ვარ და იქნებ, დადგეს დღე, როდესაც ნაკრებში გამომიძახებენ.

კვირას, “ჟილ ვისენტე” საკუთარ მოედანზე “პაკუშ დე ფერეირას” ეთამაშება. ავთოს მშობლები ლაგოსიდან, თამაშზე დასასწრებად, ბარსელუშში უნდა ჩავიდნენ. აღსანიშნავია, რომ “ჟილ ვისენტეს” პრეზიდენტმა ანტონიო ფიუზამ, მათი მგზავრობა დააფინანსა”
[Pasuxi][Cit]|

37. Dstori (Off)
[ 03 Oct 2013, 18:28 ]
გერმანიის მე-3 ლიგის მე-11 ტურის საუკეთესო ფეხბურთელის გამოსავლენად გერმანიის საფეხბურთო კავშირის ოფიციალურ ვებგვერდზე ჩატარებული გამოკითხვის შემდეგ, აკაკი გოგია მე-2 ადგილზე გავიდა.

გამოკითხვაში მონაწილეობა 5380 ქომაგმა მიიღო და 19,33 პროცენტმა (1040 ხმა), მხარი გერმანული პასპორტის მქონე ქართველ შემტევ ნახევარმცველს დაუჭირა. პირველი ადგილი “დუისბურგის” ნიგერიელმა ფორვარდმა კინგსლი ონეუგბუმ დაიკავა, რომელმაც ხმათა 77, 53 პროცენტი (4171 ხმა) მიიღო.

დანარჩენი პოზიციები ასე განაწილდა: ფლორიან პფლუგლერი (“ბურგჰაუზენი”), ვინჩენცო მარჩიზი (“შტუტგარტ კიკერსი”) და ფელიხ ლუცი (“ელვერსბერგი”).

განვლილ ტურში, “ქემნიცერთან” მოგებულ (2:1) მატჩში, გოგიამ სრულად ითამაშა და 33-ე წუთზე ანგარიში 2:0-მდე გაზარდა.
[Pasuxi][Cit]|

38. Dstori (Off)
[ 05 Oct 2013, 10:19 ]
უეფას ევროპის ლიგის ჯგუფური ეტაპის მე-2 ტურში დნეპროპეტროვსკის “დნიპრო”, სადაც ჯაბა კანკავა და ალექსანდრე კობახიძე გამოდიან, საკუთარ მოედანზე ფლორენციის “ფიორენტინასთან” 1:2 დამარცხდა.

კანკავა სასტარტო შემადგენლობაში იყო და თავიდან ბოლომდე გაისარჯა. კობახიძე 18-კაციან განაცხადში კი მოხვდა, მაგრამ მოედანზე შესვლა არ მოუწია. მატჩის 53-ე წუთზე, ანგარიში თერთმეტმეტრიანის ნიშნულიდან სტუმართა ფეხბურთელმა გონსალო როდრიგესმა გახსნა. ოთხი წუთის შემდეგ ევგენი სელეზნიოვმა ასევე პენალტიდან თანაფარდობა აღადგინა. 73-ეზე ამბროზინიმ მასპინძელთა კარი კიდევ ერთხელ აიღო. 86-ე წუთზე, მეორე ყვითელი ბარათის მიღების შემდეგ, “ფიორენტინას” კაპიტანი პისარო გააძევეს, მაგრამ “დნიპრომ” ქულა ვერ გადაარჩინა. დნეპროპეტროვსკელებს 3 ქულა აქვთ და 4-გუნდიან ჯგუფში მე-2 ადგილზე არიან.

ვარშავის “ლეგიამ”, რომელსაც ტრავმით გამოწვეული პაუზის შემდეგ ვლადიმერ დვალიშვილი დაუბრუნდა, შინ კვიპროსის “აპოლონთან” 0:1 დამარცხდა. მატჩამდე ქართველი თავდამსხმელი და გუნდის მთავარი მწვრთნელი იან ურბანი აცხადებდნენ, რომ აუცილებლად უნდა მოეგოთ, მაგრამ პოლონური კლუბი ჯერჯერობით ევროპის ლიგაში უქულოდაა და ჯგუფში ბოლოა.

დვალიშვილმა 90 წუთი ითამაშა, ხოლო “ლეგიამ” გოლი 56-ე წუთზე სანგოის დარტყმის შემდეგ გაუშვა. სხვათა შორის, ამავე ფეხბურთელმა 24-ე წუთზე თერთმეტმეტრიანი ვერ გამოიყენა.

ყაზანის “რუბინმა”, რომლის ღირსებასაც სოლომონ კვირკველია იცავს, საკუთარ მოედანზე ბელგიის “ზულტე-ვარეგემს” 4:0 აჯობა. ახალგაზრდა ქართველი მცველი სამატჩო განაცხადში არ იყო, ვინაიდან ის “რუბინს” ევროპის ლიგის განაცხადში საერთოდ არ შეუყვანია. “რუბინი” ჯგუფს 6 ქულით ლიდერობს.

განვლილ მატჩში ანგარიში მას მერე გაიხსნა, რაც დიუპოლიუმ ბურთი საკუთარ კარში ჩაჭრა. 73-ე წუთზე მეორე გოლი რომან ერიომენკომ გაიტანა. 81-ე წუთზე რიაზანცევმა მეტოქის კარი მესამედ აიღო, ხოლო 89-ეზე ნათჰომ საბოლოო ანგარიში დააფიქსირა.

მახაჩყალის “ანჟი”, რომელშიც გია გრიგალავა ირიცხება, შინ, ლონდონის “ტოტენჰემთან” 0:2 დამარცხდა. ქართველი მცველი თადარიგში იყო, მაგრამ თამაში საშუალება არ მისცეს. 34-ე წუთზე მახაჩყალელთა კარი დეფომ აიღო, ხოლო 39-ეზე – ჩადლიმ. მახაჩყალელები ერთი ქულით მე-3 პოზიციაზე იმყოფებიან.

ამავე ჯგუფში, ტირასპოლის “შერიფმა”, რომლის სპორტული დირექტორი ვაჟა თარხნიშვილია, გასვლაზე “ტრიომსოსთან” 1:1 ითამაშა. 65-ე წუთზე სტუმართა კარი ონდრაშეკმა აიღო, 87-ეზე კი, რიკარდინიომ საბოლოო ანგარიში დააფიქსირა. “შერიფი” 2 ქულით მეორეა.
[Pasuxi][Cit]|

39. Dstori (Off)
[ 05 Oct 2013, 10:23 ]
დანიური ინტერნეტგამოცემა bold.dk-ის ინფორმაციით, შარშან ზაფხულში “ორჰუსს” გორის “დილადან” მათე ვაწაძის შეძენა 5 მილიონი კრონა (900000 დოლარზე მეტი) დაუჯდა.

ეს ინფორმაცია ხსენებულ გამოცემასთან საუბარში “ორჰუსის” დირექტორმა იან კრისტენსენმა დაადასტურა: “ის დაახლოებით 5 მილიონი კრონა ღირს. ჩვენ გადავწყვიტეთ ინვესტიცია კვალიფიციურ ფეხბურთელში ჩაგვედო”.

ქართველ თავდამსხმელს გაზაფხულზე მიღებული კოჭის ტრავმის გამო 6 თვე გაუცდა და თამაში ცოტა ხნის წინ დაიწყო.

მისი თქმით, სასურველი ფორმისგან ჯერ კიდევ შორსაა: “ბედნიერი ვარ, რადგან დიდი ხნის შემდეგ დავბრუნდი და როგორც ვარჯიში, ასევე თამაში სრული დატვირთვით შემიძლია. მიუხედავად ამისა, ძალიან ცუდ ფორმაში ვარ. სრული რეაბილიტაციისთვის უფრო მეტი დრო მჭირდება, რათა სრულიად მწყობრში ვიყო”.

“ორჰუსში” 24 წლის ვაწაძემ 15 თამაში ჩაატარა და 3 გოლი გაიტანა.
[Pasuxi][Cit]|

40. Dstori (Off)
[ 07 Oct 2013, 15:43 ]
ჰოლანდიის ერედივიზონში ზედიზედ მეორე მარცხი განიცადა არნემის “ვიტესმა”, კერძოდ, შინ 1:2 “ფეიენოორდთან”. არნემელები მე-20 წუთზე უკვე ორი ბურთით აგებდნენ. 9 ტურის შემდეგ, მერაბ ჟორდანიას კლუბი მეშვიდე საფეხურზეა.

შეუცვლელად ითამაშა გურამ კაშიამ, ხოლო ვაკო ყაზაიშვილი შესვენებისას შეცვალეს - ზედიზედ მეორე მატჩია, ასე ხდება.

პორტუგალიაში ავთო ებრალიძის “ჟილ ვისენტემ” 2:1 სძლია გასული სეზონის მესამეადგილოსან “პაკოშ დე ფერეირას” და მეექვსე ადგილზეა. ებრალიძემ ამჯერად შეუცვლელად ჩაატარა მატჩი - მას გოლი არ გაუტანია, თუმცა პორტუგალიური ღეცორდ-ის ონლაინის მიხედვით, აქტიურად თამაშობდა.

უკრაინაში “სევასტოპოლი”-“ილიჩივეცი” 0:1 დასრულდა. მატჩმა ქართველების გარეშე ჩაიარა: არც მათე ღვინიანიძე, არც დავით თარგამაძე და არც თორნიკე ოქრიაშვილი მინდორზე კი არა, განაცხადშიც არ ყოფილან. ოქრიაშვილს ერთმატჩიანი დისკვალიფიკაცია ჰქონდა.

პოლონეთში ლადო დვალიშვილის “ლეგიამ” კრაკოვში 0:1 წააგო “ვისლასთან”, თუმცა ლიდერად დარჩა. ქართველმა ფორვარდმა შეუცვლელად ითამაშა და ორი საგოლე მომენტიც ჰქონდა, თუმცა ვერ გამოიყენა.

თურქეთში შოთა არველაძის გაწვრთნილმა “ქაისერისფორმა” შინ 4:0 სძლია “ელაზიგსფორს” და მეხუთე ადგილზეა. 7 ტურში 4 მოგება და 3 მარცხი აქვს.

რუსეთში “რუბინი”-ანჟი” 5:1 დასრულდა. მასპინძელთა შორის სათადარიგო გახლდათ საბა კვირკველია, თუმცა არ უთამაშია, ხოლო გია გრიგალავამ 90 წუთი გაატარა მინდორზე. “რუბინი” მერვე ადგილზეა, “ანჟი” კი - ბოლოზე
[Pasuxi][Cit]|