26. Dstori (Off)
[ 28 Sep 2013, 21:39 ]
ქართველ ლეგიონერთა ამბები გერმანიით დავიწყოთ: ბუნდესლიგაში "ჰერტამ" შინ 3:1 აჯობა "მაინცს", თუმცა ლევან კობიაშვილს არ უთამაშია – სათადარიგო გახლდათ. მართალია, იოს ლუჰუკაი კმაყოფილი დარჩა "კობის" წინა ტურში თამაშით, მაგრამ ამჯერად მაინც არ დააყენა. დედაქალაქური კლუბი მეხუთე ადგილზეა.

II ბუნდესლიგაში, ლევან ყენიას "ფორტუნამ" შინ ვერ მოუგო "ფრანკფურტს" (0:0) და მე-14 ადგილზეა. ყენია სასტარტოში გახლდათ და 81-ე წუთზე შეცვალეს. ყველაზე სახიფათო მომენტიც, სწორედ ლევანმა შექმნა, თუმცა არ გაუმართლა – პირველ ტაიმში ძელს მოარტყა ბურთი.

ლატვიის ჩემპიონატში "ვენტსპილსმა" შინ 3:0 სძლია "იურმალას", თუმცა გამარჯვებულთაგან, თორნიკე თარხნიშვილს არ უთამაშია. "ვენტსპილსი" გაუთანაბრდა თამაზ პერტიას გაწვრთნილ "სკონტოს": 21 ტურის შემდეგ, ეს გუნდები თანალიდერები არიან.

აზერბაიჯანში ბაქოს "ინტერმა" გასვლაზე 1:0 მოუგო "ხაზარს" და 7 ტურის შემდეგ მერვე პოზიციაზეა. კახა ცხადაძემ, ლაშა სალუქვაძე და ბაჩანა ცხადაძე შეუცვლელად ათამაშა, ალექსანდრე იაშვილი კი 53-ე წუთზე შეცვალა. გიორგი ლომაია სათადარიგო გახლდათ.

ნიკა გელაშვილის "ყარაბაღმა" გასვლაზე 0:0 ითამაშა "ნეფთჩისთან". ამ ორ გუნდს 15-15 ქულა აქვს და ამდენივე აქვს "გაბალასაც", რომელსაც ერთი მატჩი მარაგში აქვს და შესაბამისად, ლიდერიც ისაა. გელაშვილი "ნეფთჩისთან" სასტარტოში იყო და 76-ე წუთზე შეცვალეს.

რუმინეთში გიორგი ალავერდაშვილის "გაზ მეთანმა" გასვლაზე 2:1 სძლია მეორეადგილოსან "პანდურიის" და მეშვიდე პოზიციამდე აინაცვლა. ალავერდაშვილი, რომელმაც ერთი კვირის წინ გააფორმა "გაზ მეთანთან" კონტრაქტი, სათადარიგო გახლდათ.

უკრაინაში ჯაბა ლიპარტიას "ზორიამ" შინ 2:0 სძლია "ვოლინს" და მერვე საფეხურზეა. ლიპარტია სასტარტოში იყო და მე-60 წუთზე შეცვალეს. ქართველ ნახევარმცველს გოლის გატანაც შეეძლო, თუმცა პირველი ტაიმის ბოლოს სანტიმეტრებით ააცილა კარს.
[Pasuxi][Cit]|

28. Dstori (Off)
[ 30 Sep 2013, 8:26 ]
დანიაში გორის “დილასთვის” სასიამოვნოდ გასახსენებელი გუნდები შეხვდნენ ერთმანეთს: “ორჰუსი” სტუმრად ფრეზე გაეყარა “ოლბორგს” - 0:0. ქართველთაგან მხოლოდ მათე ვაწაძემ ითამაშა, ისიც ბოლო 19 წუთი. დავით სხირტლაძე და დავით დევდარიანი განაცხადში არ იყვნენ ტრავმების გამო. “ორჰუსი” მეხუთე ადგილზეა.

კვიპროსზე “ანორთოსისმა” მოულოდნელად შინ 1:2 წააგო “დოქსასთან”, არადა, განვლილ 3 ტურში ქულათა მაქსიმუმი ჰქონდა. “ანორთოსისის” 10 ნომერი შოთა გრიგალაშვილი 35-ე წუთზე შეცვლაზე შევიდა, როცა მისი გუნდი უკვე 0:2-ს აგებდა.

პოლონურ ექსტრაკლასას ნიკა ძალამიძე დაუბრუნდა: მან პირველი ოფიციალური მატჩი ჩაატარა ხანგრძლივი ტრავმის შემდეგ. “იაგელონიამ” გასვლაზე 1:1 ითამაშა “ზაგლებიესთან” და ძალამიძე 74-ე წუთზე შევიდა მინდორზე, ხოლო გიორგი ფოფხაძე სასტარტოში იყო და მე-60 წუთზე შეცვალეს. “იაგელონია” მეხუთე ადგილზეა.

რუსეთში “რუბინმა” “კრასნოდართან” გასვლაზე 0:1 წააგო. ყაზანელთა მწვრთნელმა ყურბან ბერდიევმა საბა კვირკველია შეუცვლელად ათამაშა. “რუბინი” მეცხრე ადგილზეა.

მახაჩყალის “ანჟიმ” კი, რომელიც ძველი “ანჟის” აჩრდილიღაა, კვლავ ვერ მოიგო - “ამკართან” შინ 2:2. გია გრიგალავამ 90 წუთი ითამაშა. “ანჟი” ბოლოდან მესამე საფეხურზეა.

თურქეთში შოთა არველაძის გაწვრთნილ “ქასიმფაშას” ჰქონდა ცუდი ტური - შინ 0:2 წააგეს “ესკიშეჰირსფორთან” და 6 ტურის შემდეგ, მერვე ადგილზეა.

უკრაინულ პრემიერლიგაში “ილიჩივეცმა” შინ 0:1 წააგო უჟგოროდის ‘ჰოვერლასთან” და მეცხრე ადგილზეა. თორნიკე ოქრიაშვილი სასტარტოში იყო და 68-ე წუთზე შეცვალეს. აქტიური იყო ქართველი, თუმცა ორ მომენტში მეკარეს ვერ აჯობა. ყვითელი ბარათიც მიიღო. რაც შეეხება დავით თარგამაძეს, ის სათადარიგო იყო და არ უთამაშია.

ქართული გოლი გავიდა ლატვიაში, სადაც “ილუკშტესის” მცველმა გიორგი ხუმარაშვილმა გაუტანა “იელგავას”. მან 51-ე წუთზე გამოიჩინა თავი, საბოლოოდ კი, “ილუკშტესმა” 1:3 წააგო. ხუმარაშვილმა და მისმა ქართველმა თანაგუნდელებმა, ლევან ჯალიაშვილმა და გიორგი ტუხაშვილმა შეუცვლელად ითამაშეს. “ილუკშტესი” ბოლო ადგილზეა.
[Pasuxi][Cit]|

30. Dstori (Off)
[ 30 Sep 2013, 8:39 ]
გერმანიის მე-3 ლიგის მე-11 ტურში, “ჰალეშერმა” საკუთარ მოედანზე “ჩემნიტცერი” 2:1 დაამარცხა და გამარჯვების გოლი აკაკი გოგიამ გაიტანა.

ქართველმა შემტევმა ნახევარმცველმა, რომელიც გერმანიის მოქალაქეა, 33-ე წუთზე ანგარიში 2:0 გახადა. მანამდე, 24-ე წუთზე მეტოქის კარი სორენ ბერტრამმა აიღო. “ჩემნიტცერმა” საპასუხო ბურთი 57-ე წუთზე პენალტიდან გაიტანა და მისი ავტორი ანტონ ფინკი აღმოჩნდა. მიმდინარე სეზონში, 21 წლის გოგიამ 10 მატჩი ჩაატარა და 2 გოლი მიითვალა. “ჰალეშერს” 16 ქულა აქვს და 20 გუნდში მე-9 ადგილზეა.

“უნტერჰახინგმა”, რომელშიც ლუკას ჰუფნაგელი ირჯება, სტუმრად “ლაიფციგთან” 2:2 ითამაშა. 19 წლის ქართული პასპორტის მქონე ნახევარმცველი 18-კაციან განაცხადში არ იყო. “უნტერჰახინგმა” 16 ქულა დააგროვა და მეათეა.

ბელარუსის პრემიერლიგაში დასარჩენად მებრძოლმა ბრესტის “დინამომ”, რომლის ღირსებასაც უჩა გოგოლაძე იცავს, შინ “ბელშინასთან” 0:1 წააგო. ქართველი თავდამსხმელი თამაშში 62-ე წუთიდან ჩაერთო. ბელარუსში პირველი ეტაპის შემდეგ, გუნდები ზედა და ქვედა ექვსეულებად დაიყო. ქვედა ექვსეულში მყოფ ბრესტელებს 27 ქულა აქვთ და 12 გუნდში მე-9 პოზიციაზე იმყოფებიან.

ესტონეთის მეისტრილიგის (უმაღლესი ლიგა) 30-ე ტურში, ტალინის “ფლორამ”, რომელსაც ზაქარია ბეგლარიშვილი დაუბრუნდა, სტუმრად თანაქალაქელ “ინფონეტს” 2:1 აჯობა. ჯერჯერობით “ფლორას” მთავარ მწვრთნელს ნორბერტ ჰარტს ბეგლარიშვილი 18-კაციან განაცხადში არ შეჰყავს. ტალინელებს 58 ქულა აქვთ და 10 გუნდში მე-4 ადგილი უკავიათ.

“პაიდემ” თავის მოედანზე “კურესაარე” 4:1 დაამარცხა. თენგიზ ეთერია მასპინძელთა რიგებში 67-ე წუთზე გამოჩნდა და 20 წუთის შემდეგ, ანგარიში 3:0 გახადა. 23 წლის ქართველი თავდამსხმელისთვის, რომელმაც მიმდინარე სეზონში 13 მატჩი ჩაატარა, ეს გოლი პირველი აღმოჩნდა. “პაიდეს” 41 ქულა აქვს და მეხუთეა.

უზბეკეთის უმაღლესი ლიგის მე-20 ტურში, “ოლმალიქმა” სადაც გიორგი კვესიეშვილი გამოდის, გასვლაზე “ნოვბახორი” 3:1 დაამარცხა. კვესიეშვილმა თავიდან ბოლომდე ითამაშა. “ოლმალიქს” 30 ქულა აქვს და 14-გუნდიან ჩემპიონატში მე-5 ადილზეა.

მოლდოვის ნაციონალ დივიზიის მე-10 ტურში, ბელცის “ოლიმპიამ” შინაურ კედლებში “ტირაპოსლთან” 0:3 წააგო. მასპინძლებში ბექა ქართველიშვილმა მოედანზე 90 წუთი დაჰყო. “ოლიმპიას” 5 ქულა აქვს და 12 გუნდში ბოლოსწინაა.

კიშინიოვის “ზიმბრუმ” სტუმრად “რაპიდს” 1:0 მოუგო. თორნიკე სტეფნიაშვილს კიშიონიოველებში არც ამჯერად უთამაშია, მხოლოდ სათადარიგოებში ჯდომით შემოიფარგლა. “ზიმბრუს” 16 ქულა აქვს და მესამეა.
[Pasuxi][Cit]|

32. Dstori (Off)
[ 01 Oct 2013, 19:45 ]
დნეპროპეტროვსკის “დნიპროს” საყრდენი ნახევარმცველი ჯაბა კანკავა ინტერნეტგამოცემა ua-football.com-ის ვერსიით, უკრაინის საფეხბურთო პრემიერლიგის მე-11 ტურის სიმბოლურ ნაკრებში მოხვდა.

“ტურის ცენტრალურ მატჩში ქართველ ლეგიონერს დნეპროპეტროვსკელთა ყველაზე შესამჩნევ ფიგურას ნაკლებად თუ უწოდებ. თუმცა, კანკავამ წყვილში როტანთან ერთად მოედნის ცენტრში დაუჯერებლად დიდი “შავი” სამუშაო გასწია –ზღვისპირელთა შეტევებს შლიდა, მეტოქეს ბურთს ართმევდა და თავისი გუნდის შეტევებს იწყებდა. ოდესელებთან მატჩში ჯაბამ ძალისმიერი ორთაბრძოლების უმეტესობა მოიგო და “ჩერნომორეცის” ისეთ ფეხბურთელებს გაუმკლავდა როგორიც ალექსეი გაი და კირილ კოვალჩუკი არიან, რაც იოლი საქმე არაა” – იუწყება ua-football.com-ი კანკავას შესახებ.

მე-11 ტურში, “დნიპრომ” საკუთარ მოედანზე ოდესის “ჩერნომორეცი” 2:0 დაამარცხა.

აქვე გეტყვით, რომ ხსენებული ვებგვერდის ვერსიით, კანკავა მიმდინარე სეზონში ტურის სიმბოლურ ნაკრებში მესამედ მოხვდა.

და ბოლოს, საქართველოს ეროვნული გუნდის კაპიტანი ჯაბა კანკავა მსოფლიოს 2014 ჩემპიონატის შესარჩევ ციკლში ესპანეთის ნაკრების წინააღმდეგ ვერ ითამაშებს, რადგან ფინეთთან მატჩი გააძევეს და დისკვალიფიცირებულია.
[Pasuxi][Cit]|