18. Dstori (Off)
[ 26 Sep 2013, 13:38 ]
არნემის “ვიტესმა” ჰოლანდიის თასის მეორე რაუნდში ქვედალიგელ “რუდერკერკს” 3:1 სძლია და შემდეგ ეტაპზე გავიდა. გურამ კაშიამ შეუცვლელად ითამაშა, ვაკო ყაზაიშვილი 74-ე წუთზე შეცვალეს, ხოლო გიორგი ჭანტურია, გეცოდინებათ, დისკვალიფიკაციას იხდის. არნემელთაგან ერთი გოლი კაშიამ გაიტანა, კერძოდ, 66-ე წუთზე, რითაც 2:1 გახდა. “ვიტესის” საიტის ცნობით, ის თეო იანსენის კუთხურიდან ჩაწოდების შემდეგ დაუხვდა ბურთს და ზუსტად დაარტყა.

უკრაინის თასის მეთექვსმეტედფინალებიც გაიმართა: “დნიპრომ” 2:0 სძლია “ბუკოვინას”. ჯაბა კანკავა სასტარტოში იყო და 76-ე წუთზე შეცვალეს, ხოლო სანდრო კობახიძემ მეორე ტაიმი ჩაატარა სრულად. კობახიძეს გოლის გატანაც შეეძლო, მაგრამ კარგი გარღვევა ოდნავ არაზუსტი დარტყმით დაასრულა.

“ნიკოლაევმა” 120-წუთიან ბრძოლაში აჯობა “ზირკას”. მოგებულთაგან შეუცვლელად ითამაშა ქართველმა მცველმა გიორგი ჯგერენაიამ, რომელიც “გაგრაში” და შემდეგ “ილიჩივეცში” გამოდიოდა.

ჯაბა ლიპარტიას “ზორია” დამატებით დროში გავარდა პირველლიგელ “ავანგარდთან” (1:3). ძირითადი დრო 1:1 დასრულდა. ლიპარტია სასტარტოში არ გახლდათ, 46-ე წუთზე შევიდა მინდორზე.

ლატვიაში დაუგავპილსის “დაუგავამ” გასვლაზე 2:2 ითამაშა “მეტალურგსთან”. შეხვედრის ბოლო გოლი სტუმართა ფორვარდმა მამუკა ღონღაძემ გაიტანა 63-ე წუთზე. “დაუგავადან” სამი ქართველი იყო მოედანზე: ღონღაძე ბოლო წუთზე შეცვალეს, ჩიხრაძე 88-ეზე, ხოლო ცინცაძემ ბოლომდე ითამაშა. “დაუგავა” მესამე ადგილზეა.

“ვენტსპილსმა” სტუმრად 2:0 სძლია “იურმალას”. გამარჯვებულთაგან თორნიკე თარხნიშვილმა მეორე ტაიმი სრულად ჩაატარა. “ვენტსპილსი” მეორე ადგილზეა: 3 ქულით ჩამორჩება თამაზ პერტიას გაწვრთნილ “სკონტოს” და ერთი თამაშით ნაკლები აქვს ჩატარებული.

რუსეთის პრემიერლიგაში ალეკო ამისულაშვილის “კრილიამ” შინ 1:4 წააგო “ზენიტთან”. ქართველმა მცველმა შეუცვლელად ითამაშა, მისი გუნდი კი მე-12 ადგილზეა.

ზოგიერთი მატჩი ახლა მიმდინარეობს და მოგვიანებით მოგაწვდით მათზე ინფორმაციას.
[Pasuxi][Cit]|

20. Dstori (Off)
[ 26 Sep 2013, 13:47 ]
პოლონეთის ჩემპიონატის მეცხრე ტურში, ნიკა ძალამიძისა და გიორგი ფოფხაძის "იაგელონიამ" შინ 2:3 წააგო ლიდერ "ლეგიასთან", რომლის რიგებში კვლავაც არ გამოჩენილა ლადო დვალიშვილი - ვარშაველთა ბომბარდირი ტრავმირებულია. "იაგელონიადან" მხოლოდ ფოფხაძემ ითამაშა, ბოლო ნახევარი საათი დაჰყო მინდორზე. რაც შეეხება ნიკა ძალამიძეს, სათადარიგო გახლდათ და მწვრთნელმა მისი შეყვანა ჯერ ვერ გარისკა: მას ხომ დიდი ხანი გაუცდა ტრავმისა და ოპერაციის გამო. "იაგელონია" მეხუთე ადგილზეა.

გერმანიის თასიდან გავარდა "ჰერტა", რომელმაც კაიზერსლაუტერნში 1:3 წააგო. ლევან კობიაშვილი სათადარიგო გახლდათ და არ უთამაშია.

დანიის თასზე მეორე რაუნდი გადალახა "ორჰუსმა", რომელმაც გასვლაზე 3:1 აჯობა "ბრონშოის". არცერთ ქართველს არ უთამაშია: მათე ვაწაძე სათადარიგო იყო, ხოლო დავით დევდარიანი და დავით სხირტლაძე განაცხადს მიღმა დარჩნენ. დევდარიანს ტრავმა აქვს.

რუსულ პრემიერლიგაში ცსკა-"ანჟი" 0:0 დასრულდა. გია გრიგალავამ შეუცვლელად ითამაშა და კარგადაც გამოიყურებოდა. "ანჟი" ბოლოდან მესამე პოზიციაზეა – 10 ტურში 5 ფრე და 5 მარცხი აქვს.

უკრაინის თასის მერვედფინალიდან გავარდა "ილიჩივეცი", რომელმაც შინ 0:3 წააგო "შახტართან". თორნიკე ოქრიაშვილმა შეუცვლელად ითამაშა, დავით თარგამაძე კი 67-ე წუთზე შეცვალეს. "შახტარის" უპირატესობა ძალიან დიდი იყო, ხოლო ქართველებს შანსი არ მისცემიათ.

"კარპატი"-"სევასტოპოლი" 1:0 დასრულდა. სტუმართა გუნდში შეუცვლელად ითამაშა მათე ღვინიანიძემ.

რუმინულ "გაზ მეთანში" დებიუტი ჰქონდა ქართველ შემტევ გიორგი ალავერდაშვილს, რომელმაც რამდენიმე დღის წინ გააფორმა კონტრაქტი. ალავერდაშვილი რუმინეთის თასზე "პეტროლისტულთან" 4:0 მოგებულ შეხვედრაში 57-ე წუთზე შევიდა მოედანზე. მწვრთნელმა კრისტიან დულჩამ, მოკლედ დაახასიათა ეს ფეხბურთელი – ტექნიკურია, ბურთს კარგად ფლობს და დღეს თავდამსხმელების უკან ვათამაშეთ, მაგრამ ფორვარდადაც შეუძლია გამოსვლაო.

პორტუგალიის თასის პირველ რაუნდში "მორეირენსესა" და "ჟილ ვისენტეს" შორის შეხვედრა 0:0 დასრულდა. ავთო ებრალიძე კვლავ სასტარტოში იყო და 58-ე წუთზე შეცვალეს. "ჟილ ვისენტეს" 21 წლის ქართველ შემტევს, 27-ე წუთზე ცოტა დააკლდა გოლამდე – მეკარემ ურთულესი ბურთი მოიგერია.
[Pasuxi][Cit]|

22. Dstori (Off)
[ 27 Sep 2013, 9:26 ]
ლადო დვალიშვილს, ვარშავის "ლეგიაში" სამი მატჩი გაუცდა, მათ შორის, ევროპის ლიგის ჯგუფურ ეტაპზე "ლაციოსთან" შეხვედრაც. ლადომ "მსოფლიო სპორტს" უთხრა, რომ ტრავმამ თითქმის გაუარა და შესაძლოა, პოლონეთის მომდევნო ტურის მატჩში ითამაშოს.

"კუნთის პრობლემა მქონდა, დაჭიმული იყო და ვერ ვვარჯიშობდი. სამ დღეში გუნდთან ერთად დავიწყებ ვარჯიშს. მოკლედ, საშიში არაფერია".

ამასობაში, "ლეგია" 4-ქულიანი ჰანდიკაპით ლიდერობს ჩემპიონატს. ლადოს კი 6 მატჩში 5 გოლი აქვს გატანილი. 5 ბურთი რამდენიმე მოთამაშეს აქვს, მათ კი ერთით უსწრებს ასევე "ლეგიას" ფეხბურთელი რადოვიჩი.
[Pasuxi][Cit]|

24. Dstori (Off)
[ 27 Sep 2013, 9:33 ]
როგორც შევიტყვეთ, არნემის "ვიტესი" დაინტერესებულია გორის "დილას" მცველ მამუკა კობახიძით და არაა გამორიცხული, ზამთარში მისი გადაყვანა სცადოს. "მსოფლიო სპორტის" ინფორმაციით, "ვიტესის" პრეზიდენტი მერაბ ჟორდანია, ამ საკითხს განიხილავს.

კობახიძეს წლის პირველი ნახევარი გაუცდა "ალანიაში", სადაც სათამაშო პრაქტიკა არ ჰქონდა, თუმცა ზაფხულში კარგად წარმოაჩინა თავი გორის "დილაში". საქართველოს ახალგაზრდული ნაკრების ცენტრალურმა მცველმა, 21-წლამდელებში ორჯერ გაიტანა გოლი: ჯერ ლატვიასთან ამხანაგურში (4:0) და შემდეგ ლუქსემბურგთან ევროშესარჩევში (3:0).

10 ოქტომბერს, 21-წლამდელთა შესარჩევში, საქართველო ჰოლანდიას უმასპინძლებს და კობახიძეზე დაკვირვება ამ მატჩშიც გაგრძელდება.
[Pasuxi][Cit]|