lanchxutis guria | Qartuli Forumi

20. Dstori (Off)
[ 14 Sep 2013, 13:45 ]
11-წლიანი პაუზის შემდეგ ძველისძველი მეტოქეები, “ტორპედო” და “გურია” უმაღლეს ლიგაში ერთმანეთს დაუპირისპირდნენ. შეხვედრა მასპინძელთა უპირატესობით დაიწყო და მე-3 წუთზე მათ ანგარიშის გახსნის შესაძლებლობაც მიეცათ. მარჯვენა ფრთიდან ჯიქიას მოწოდებულ ბურთს კაპანაძე ურტყამდა შეუჩერებლივ, მაგრამ ბობღიაშვილიც უშეცდომოდ გაისარჯა და თავისიანები ხიფათისგან იხსნა. მალე საბანაძემ გოლიც გაიტანა, თუმცა, მანამდე თანამსაჯს თამაშგარე დაეფიქსირებინა.

მე-10 წუთისთვის სტუმრებიც გამოცოცხლდნენ. გამოცდილი კოშკაძე ზედიზედ ორჯერ ურტყამდა სახიფათოდ, მაგრამ ორივეჯერ მისი მცდელობა უზუსტო გამოდგა.

ტაიმის მესამედის მიწურულს გურულები კურიოზულ გოლს გადაურჩნენ. მარჯვენა ფლანგიდან ჯიქიას გამჭოლი გადაცემის შემდეგ იობაშვილს ბურთი ფეხზე აეჭრა და კინაღამ საკუთარი კარი დალაშქრა. სტუმართა საპასუხო ჩხვლეტა ისევ კოშკაძის აქტიურობას მოჰყვა. გურულთა ნახევარმცველი მოედნის ცენტრიდან დაიძრა და საჯარიმოს წინა ხაზთან მისულმა ძლიერად გაისროლა. ბურთი ტორპედოელთა კარის ბადეს გარედან შეეხო.

ამის შემდეგ მასპინძელთა უპირატესობა გამოიკვეთა და ტაიმის დარჩენილი დრო მათი კარნახით წარიმართა. მე-20 წუთზე მარჯვენა ფრთაზე ჯიქიამ რეიდი წამოიწყო. მან გზა და გზა რამდენიმე მეტოქე ჩამოიტოვა და განივი გადაცემით საბანაძე ხელსაყრელ პოზიციაში გაიყვანა. ტორპედოელთა ფორვარდმა თანაგუნდელს ამაგი დაუფასა და საჯარიმოს რკალიდან გამიზნული დარტყმა განახორციელა. ბობღიაშვილი ამჯერადაც დიდებულად გაისარჯა. იგი ნახტომით მისწვდა ბურთს და კუთხურზე მოიგერია. თითქმის მაშინვე გოროზიას ჩაწოდებული საჯარიმოს შემდეგ კაპანაძე ურტყამდა შეუჩერებლივ, მაგრამ გურულთა კიპერს ვერც მან აჯობა. 5 წუთის შემდეგ მოვლენების ეპიცენტრში ისევ ბობღიაშვილი აღმოჩნდა, როცა მან გოროზიას სახიფათო გასროლა უვნებელყო.

37-ე წუთზე ქუთათურებს ანგარიშის გახსნის 100%-იანი, შესაძლებლობა მიეცათ. გოროზიამ კარგი გადაცემით ჯიქია მეკარესთან პირისპირ გაიყვანა. მან ყველაფერი ზუსტად გათვალა და კარის შორეულ კუთხისკენ დაარტყა, მაგრამ ბობღიაშვილმა ამჯერადაც პატარა სასწაული მოახდინა. იგი თითებით მისწვდა ბურთს და კუთხურზე მოიგერია.

ტაიმის ბოლოს მასპინძლებმა სახიფათოდ კიდევ ერთხელ შეუტიეს. ამ მატჩში ქუთათურთა გამორჩეულმა ტრიომ ლამაზი სამსვლიანი კომბინაცია გაითამაშა. გოროზიამ დიაგონალური გადაცემით ჯიქია მარჯვენა ფრთაზე მოძებნა, რომელმაც ზუსტი პასით საბანაძე ხელსაყრელ პოზიციაზე გაიყვანა. ტორპედოელთა ფორვარდმა კომბინაცია სწორად გააგრძელა და გურულთა კარისკენ შეუჩერებელი დარტყმა განახორციელა. მასპინძელთა სამწუხაროდ ბურთი ოდნავ ასცდა მიზანს.

მეორე ტაიმი განსხვავებული სცენარით წარიმართა. შეხვედრის განახლებისთანავე სტუმრებმა სახიფათო შეტევა წამოიწყეს. ჯიშკარიანი მარცხენა ფრთაზე გაიჭრა და საჯარიმოში შეჭრილი კუკულაძისკენ მაღალი გადაცემა განახორციელა. კუკულაძე თავით მისწვდა ბურთს და მიმართულება შეუცვალა, მაგრამ მისი დარტყმული ოდნავ გადასცდა ხარიხას.

ამის შემდეგ შეხვედრა გარდამავალი უპირატესობით გაგრძელდა. 56-ე წუთზე ტორპედოელთა სწრაფი იერიშის შემდეგ საბანაძე ურტყამდა საჯარიმოს კუთხიდან, მაგრამ ბობღიაშვილმა დარტყმის მიმართულება გამოიცნო და ბურთს ნახტომში დაეუფლა.

მატჩის კულმინაციური მომენტი 72-ე წუთზე დადგა. ისიანმა და შეცვლაზე შესულმა ტორონჯაძემ ორსვლიანი კომბიანცია გაითამაშეს, რის შემდეგაც ეს უკანასკნელი ხელსაყრელი მდგომარეობიდან ურტყამდა, თუმცა ტორპედოელთა მცველებმა სიტუაცია განმუხტეს და სწრაფი კონტრშეტევა წამოიწყეს, რომლის შეჩერება მოედნის ცენტრალურ ნაწილში იობაშვილმა უხეში თამაშის ხარჯზე მოახერხა. არბიტრმა სტუმრები დააჯარიმა და იობაშვილს ყვითელი ბარათი უჩვენა, რომლისთვისაც ეს მეორე გაფრთხილება გამოდგა და გურულთა მცველს მოედნის დატოვება მოუწია. სტუმართა კაცნაკლულობით ქუთათურებმა მომენტალურად ისარგებლეს და სანამ გურულები დაცვაში გადაწყობას მოახერხებდნენ, სწრაფი კომბინაცია გაითამაშეს, რომლის შემდეგ კუხიანიძე საგოლე კომბინაციაში აღმოჩნდა. ტორპედოელთა ნახევარმცველმა თანაგუნდელებს ამაგი დაუფასა და ზუსტი დარტყმით გურულთა კარის ბადე შეარხია- 1:0

83-ე წუთზე მასპინძლებს ანგარიშის ორამდე გაზრდა მართებდათ. კაპანაძემ სტუმართა მცველების უყურადღებობით ისარგებლა, მეტოქეს ბურთი მოპარა და საჯარიმო მოედანში შეიჭრა, სადაც ჯოჯუასთან ორთაბრძოლაში გაზონზე გართხმული აღმოჩნდა. მასპინძლები პენალტს ითხოვდნენ, თუმცა არბიტრმა თამაშის გაგრძელება ბრძანა, რითაც მატჩზე დამსწრე ქუთათურთა ქომაგები განარისხა.

2 წუთის შემდეგ თავის გამოჩენის შანსი კაპანაძის ნაცვლად შეცვლაზე შესულ ფანცულაიას მიეცა, მაგრამ მეტოქის საჯარიმოში ეულად მყოფმა ბურთი ვერ დაიმორჩილა და ანგარიშის გაზრდის შესაძლებლობა გაანიავა.

შეხვედრის დარჩენილი დრო სტუმრებმა შეტევებში გაატარეს, თუმცა მათ იერიშებს ხან მასპინძელთა მცველები იგერიებდნენ, ხან კი ტორპედოელთა ახალი კაპიტანი მაქსიმე ქვილითაია იდგა მოწოდების სიმაღლეზე.

არბიტრის საფინალო სასტვენს ადგილობრივი დიქტორის ინფორმაცია დაერთო, რომელმაც გორელთა ზესტაფონში დამარცხება გვამცნო, რის შემდეგაც ,,ტორპედო” ერთპიროვნულად გალიდრდა.

მატჩის შემდეგ ,,მსოფლიო სპორტმა’’ ორივე გუნდის მწვრთნელებს კომენტარი ჩამოართვა:

ჟერარდ სარაგოსა (,,ტორპედო”): ,,პირველ ტაიმში კარგად ვითამაშეთ, მეორეში კი დაღლა დაგვეტყო. ჯიქიასა და გოროზიას შეცვლაც ამით იყო გამოწვეული. რაც მთავარია გავიმარჯვეთ, რითაც ძალიან კმაყოფილი ვარ. დიდი მადლობა ბიჭებს თავდადებისთვის.”

დავით მახარაძე (,,გურია”): ,,პირველ ტაიმში მეტოქემ გვაჯობა, მეორეში კი თამაში გავათანაბრეთ და რამდენიმე მომენტიც შევქმენით. წაგებას ნამდვილად არ ვიმსახურებდით. იობაშვილის გაძევებამ გუნდზე ცუდად იმოქმედა. დაცვაში გადაწყობა ვერ მოვასწარით, მეტოქემ კი ამით მომენტალურად ისარგებლა. ვულოცავ მათ ამ გამარჯვებას.”

,,ტორპედო” (ქუთაისი) - ,, გურია” (ლანჩხუთი) 1:0 (0:0)
13 სექტემბერი. ქუთაისი. ,,ცენტრალური”. 2000 მაყურებელი

,,ტორპედო”: ქვილითაია (კ), სანდოხაძე, ცინცაძე, საბანაძე, ჯიქია (მზევაშვილი 59), კუხიანიძე, ხიდეშელი, გოროზია (გიგაური 69), მთივლიშვილი, კაპანაძე (ფანცულაია 84), უბილავა;

მთავარი მწვრთნელი: ჟერარდ სარაგოსა

,,გურია ”: ბობღიაშვილი, შალამბერიძე, იობაშვილი, ჩიკვილაძე, ჯიშკარიანი, ჯოჯუა, შენგელია (ჭეიშვილი 30), კოშკაძე, დარჩიძე (ჯოხაძე 76), კუკულაძე (კ) (ტორონჯაძე 58), ისიანი;

მთავარი მწვრთნელი: დავით მახარაძე

გოლები: 1:0 კუხიანიძე (73);

გაფრთხილება: დარჩიძე (37), კუხიანიძე (53), მთივლიშვილი (59), იობაშვილი (66, 72), კაპანაძე (75);

გაძევება: იობაშვილი (72)

არბიტრი: ლაშა სილაგავა
[worldsport.ge]
[Pasuxi][Cit]|

21. Dstori (Off)
[ 07 Oct 2013, 15:53 ]
ნამდვილად კარგად დაცადეს ქობულეთის ,,ჩელე არენა’’ გურულებმა. ჯერ იყო და ქართული ფეხბურთის ფლაგმანი თბილისის ,,დინამო’’ დაამარცხეს, შემდეგ რუსთავის ,,მეტალურგსაც’’ სძლიეს, ახლა კი ევროპის ლიგაზე არც თუ ურიგოდ მოასპარეზე გორელები შინ ასევე უქულოდ გაისტუმრეს.

შეხვედრა მასპინძელთა შეტევებით დაიწყო და მე-5 წუთზე მათ ანგარიშის გახსნის 100%-იანი შესაძლებლობა მიეცათ. კუკულაძემ სტუმართა მცველების შეცდომით ისარგებლა და მეკარესთან პირისპირ გაიჭრა. გურულთა კაპიტანს ხელს არავინ უშლიდა, მაგრამ მან რატომღაც რევიშვილის მოტყუება მოინდომა, ეროვნული ნაკრების კარის დარაჯს ვერ აჯობა და დაწინაურების შანსიც გაანიავა. მომდევნო სახიფათო მასპინძლებმა მე-19 წუთზე შექმნეს. გორელთა შეტევის შემდეგ ბობღიაშვილი ბურთს დაეუფლა და ძლიერი დარტყმით იგი შალამბერიძისკენ გადაამისამართა. გურულთა ნახევარმცველმა მეკარის დაწყებული იერიში გააგრძელა და საჯარიმოში შევარდნილ კოშკაძისკენ გამჭოლი გადაცემა გააკეთა, რომელმაც თანაგუნდელთა კომბინაცია შეუჩერებელი დარტყმით დაასრულა. გურულთა სამწუხაროდ, ბურთი კარის ბადეს გარედან შეეხო.

ტაიმის შუაწელიდან სტუმრებიც გამოცოცხლდნენ და თამაში გარდამავალი უპირატესობით გაგრძელდა. ანგარიშში დაწინაურების კარგი შესაძლებლობა გორელებს 23-ე წუთზე მიეცათ. მრავალსვლიანი კომბინაცია მოდებაძემ გააგრძელა და იდეალური პასით აბურჯანია საგოლე პოზიციაში გაიყვანა. მართალია, გორელთა ახალგაზრდა ფეხბურთელმა დარტყმა დროულად შეასრულა, მაგრამ ბობღიაშვილიც შესაშურად გაისარჯა, იგი ნახტომით მისწვდა ბურთს და კუთხურზე მოიგერია.

სტუმართა სახიფათო ჩხვლეტას გურულებმა 5 წუთში უპასუხეს. კუკულაძემ მარჯვენა ფლანგზე გაინავარდა და საჯარიმოში მყოფ ისიანს მაღლივი, გამიზნული გადაცემით ბურთი პირდაპირ თავზე დაასვა. ლანჩხუთელთა ფორვარდმა თანაგუნდელს ამაგი დაუფასა და თავური დარტყმით ბურთი სტუმართა კარისკენ გადაგზავნა, რომელიც ძელმა აისხლიტა. დამატებაზე მასპინძლებმა ვეღარ ივარგეს.

ამის შემდეგ წვიმა დაიწყო და თამაში შედარებით დამშვიდდა. თუ არ ჩავთვლით მოდებაძის ძლიერ გასროლას საჯარიმოს რკალიდან, რომლის შემდეგაც ბურთმა ხარიხას ზევიდან გადაუფრინა. ტაიმის ბოლომდე აღსანიშნავი აღარაფერი მომხდარა.

შეხვედრის მეორე ნახევარში წვიმამ კიდევ უფრო იმატა და მოედანზე ძალისმიერი ბრძოლა გაჩაღდა. მიუხედავად ამისა, ორმხრივი შეტევები არ შენელებულა და სახიფათო მომენტებიც მრავლად იქმნებოდა.

56-ე წუთზე შალამბერიძის მოწოდებულ კუთხურზე ყველაზე მარჯვე ისიანი გამოდგა. მან ყველას დაასწრო და თავური დარტყმით ბურთი გორელთა კარისკენ გაგზავნა, თუმცა უშედეგოდ. 2 წუთში სტუმრებმა სწრაფი კონტრშეტევა განახორციელეს. გორელიშვილის გადაცემით მაისურაძე ხელსაყრელ სიტუაციაში აღმოჩნდა, მაგრამ მისი დარტყმული ოდნავ ასცდა მიზანს. მე-60 წუთზე თანაგუნდელებმა ისიანი დასარტყმელ პოზიციაში გაიყვანეს. იგი ოდნავ წინ გადაადგილდა და საჯარიმოს ხაზიდან ძლიერად გაისროლა. რევიშვილმა სწორი პოზიცია დაიჭირა და ხიფათი უვნებელყო.

3 წუთში გურულებმა ანგარიში გახსნეს. მატჩის საუკეთო მოთამაშეს, კობა შალამბერიძეს შრომა დაუფასდა. ლანჩხუთელთა სწრაფი შეტევის დამამთავრებელ ფაზაში საჯარიმოს კუთხესთან ბურთს შალამბერიძე დაეუფლა. იგი ოდნავ ცენტრისკენ გადაადგილდა და ძლიერი დარტყმით გორელთა კარის ბადე შეარხია – 1:0.

იგრძნეს რა დამარცხების საშიშროება, სტუმართა დამრიგებელმა ორმაგ შეცვლას მიმართა და მთელი გუნდი შეტევაზე გადააწყო. 67-ე წუთზე მოედნის კიდესთან დანიშნული ჯარიმა შეცვლაზე შესულმა ალადაშვილმა პირდაპირ კარში ჩაახვია. ბობღიაშვილი გამოსვლაზე შეცდა, მაგრამ გურულთა გასახარად ბურთმა კარის მარცხენა ძელს სანტიმეტრებში ჩაუქროლა. 5 წუთში გორელებს ანგარიშის გაქვითვის საუკეთესო შესაძლებლობა მიეცათ. ახალშემოსული ქვილითაიას დარტყმა ბობღიაშვილმა გაჭირვებით მოიგერია. მეკარის ბაქნიდან დამატებას გორელი ფეხბურთელები ცდილობდნენ, მაგრამ იობაშვილმა ივაჟკაცა. მეტოქის დარტყმულს ჩაუწვა და თავისიანები აშკარა უსიამოვნებისგან იხსნა.

ამის შემდეგ შალამბერიძის ჯერი დადგა. მის აქტიურობას ხუთი წუთის განმავლობაში ზედიზედ სამი სახიფათო მომენტი მოჰყვა. 75-ე წუთზე მან პრაქტიკულად თავისი საგოლე შეტევა გაიმეორა და კარში დარტყმა თითქმის იმავე ადგილიდან განახორციელა, მაგრამ ამჯერად სამიზნემ დააღალატა. ორი წუთის შემდეგ მისი კარგი გადაცემით კოშკაძე მეკარესთან პირისპირ გადიოდა, თუმცა რევიშვილმა სიტუაცია სწორად შეაფასა, გურულ ფეხბურთელს ბურთთან წამით მიასწრო და ხიფათი განმუხტა, თუმცა დროებით, ზემოთხსენებული დუეტის აქტიურობას მასპინძელთა მეორე გოლი მოჰყვა. 79-ე წუთზე გურულთა შეტევის შემდეგ შალამბერიძე საჯარიმოს კუთხესთან ხელსაყრელ პოზიციაში აღმოჩნდა. მან სწორი გადაწყვეტილება მიიღო და ბურთი უკეთეს მდგომარეობაში მყოფ კოშკაძეს გადააწოდა. ლანჩხუთელთა გამოცდილმა ნახევარმცველმა თანაგუნდელებს გარჯა დაუფასა და ზუსტი დარტყმით ანგარიში გაზარდა – 2:0.

ამის შემდეგ გორელებმა ერთი კიდევ გაიბრძოლეს, მაგრამ 82-ე წუთზე მათი მდგომარეობა უფრო დამძიმდა. ჩუენსუს წინააღმდეგ უხეში თამაშისთვის არბიტრმა ღონღაძე მოედნიდან გააძევა. ათი კაცის წინააღმდეგ დარჩენილმა გურულებმა კიდევ უფრო გაილაღეს და შეხვედრის ბოლოს დიდი ანგარიშით გამარჯვების შანსიც მიეცათ. შეცვლაზე შესული შენგელიას მარჯვენა ფრთიდან ჩაწოდების შემდეგ ისიანი ურტყამდა თავით მეკარის ბაქნიდან, მაგრამ ბურთი ამჯერადაც კარის ძელმა აისხლიტა.

ამასობაში არბიტრის საფინალო სასტვენის ხმაც გაისმა, რომელმაც ლანჩხუთელთა დამსახურებული გამარჯვება დააფიქსირა.

მატჩისშემდგომი პრესკონფერენცია:

რომან პოკორა (,,გურია”): ,,ჩემი აზრით დამსახურებულად გავიმარჯვეთ. ,,გურიას’’ მოგება უფრო უნდოდა. ბიჭების დიდი მადლობელი ვარ. მათ ყველაფერი გაიღეს გამარჯვებისთვის. ჩვენი მიზანი დღევანდელი დღით არ შემოიფარგლება. გვინდა, რომ ექვსეულში მოვხვდეთ. მართალია, ქობულეთში თავს კარგად ვგრძნობთ, მაგრამ საკუთარ მოედანზე თამაში გვირჩევნია. როგორც შეგვპირდნენ, 3 ნოემბრიდან საკუთარ არენაზე ვითამაშებთ”.

გიორგი ტუღუში (,,დილა”) - ,,დაძაბული თამაში იყო. პირველი გოლი უხეში შეცდომის შედეგად მივიღეთ. შემდეგ წინ წავედით და გათანაბრება ვცადეთ, თუმცა არ გამოგვივიდა. ჩვენმა მთავარმა მწვრთნელმა გუნდში ახალი სისტემით თამაში დანერგა. ამას დრო სჭირდება. ყველაფერი უცებ არ გამოდის. იმედი გვაქვს მომავალ შეხვედრებში გავიმარჯვებთ”.

,,გურია” (ლანჩხუთი) - ,,დილა” (გორი) 2:0 (0:0)
6 ოქტომბერი. ქობულეთი. ,,ჩელე არენა”. 500 მაყურებელი

,,გურია”: ბობღიაშვილი, ჩუენსუ, იობაშვილი, ჩიკვილაძე, ჯიშკარიანი, ჯოჯუა, გაჩეჩილაძე (დარჩიძე 64), კუკულაძე (კ) (შენგელია 61), კოშკაძე, შალამბერიძე, ისიანი (ტორონჯაძე 90);

მთავარი მწვრთნელი: რომან პოკორა

,,დილა”: რევიშვილი, ღონღაძე, კობახიძე, თომაშვილი, ფილიევი (გ. ქვილითაია 67), აბურჯანია, დიასამიძე (დოლიძე 68), გორელიშვილი, მაისურაძე, მოდებაძე (კ), გ. გურული (ალადაშვილი 15);

მთავარი მწვრთნელი: გიორგი დევდარიანი

გოლები: 1:0 შალამბერიძე (63), 2:0 კოშკაძე (79);

გაფრთხილება: აბურჯანია (38), გაჩეჩილაძე (43), ჯოჯუა (83), დოლიძე (90+3);

გაძევება: ღონღაძე (82);

არბიტრი: დავით ხარიტონაშვილი
[Pasuxi][Cit]|